GodFather: இது ஒரு **ப் படம்

சமீபமாக Netflix-ன் தயவில் வாரம் 2-3 படங்கள் பார்க்கும் வாய்ப்பு. இதையே சாக்காக வைத்து 'வாரம் ஒரு திரைப்படம்' அப்படின்னு ஏதாவது மொக்கை போடலாம்னு நினைச்சப்போ (ஆசை யாரை விட்டது!) முதலில் தோன்றியது Godfather படம்தான். மூன்று பகுதிகளையும் தொடர்ச்சியாக பார்த்து முடித்தேன். முன்னமே பார்த்திருந்தாலும் இப்படி ஒன்றாக சேர்த்து பார்ப்பது இதுவே முதன் முறை. அது ஒரு சிறந்த அனுபவம். இந்தப் படத்தின் பாதிப்பு இருக்கும் என்று நான் நினைக்கும் படங்களின் பட்டியலை வைத்து ஒரு முனைவர் பட்டமே ஆய்வு செய்யலாம். அத்தனைப் படங்கள் நினைவுக்கு வந்து போகின்றன. நாயகன், தேவர் மகன், குரு என்று ஆரம்பித்து சமீபத்தில் வந்த பட்டியல், புதுப் பேட்டை வரை - அது என்ன சொல்வார்கள் - இண்ஸ்பிரேஷன் - ஹாங்... அதேதான்.

தலைப்பை பார்த்து யாரும் 'ஆய்' 'ஊய்'ன்னு குதிக்க வேணாமேன்னுதான் கொஞ்சம் மைதா மாவு (மாஸ்க்) வேலை. இந்த முறை பெரும்பாலும் நேராகப் பார்க்காமல், கொஞ்சம் ஒருக்களித்து கோணலாகப் பார்த்ததினால் சில புதிய கோணங்கள் கிடைத்தது. தொடர்ந்து வாசித்த பல்வேறு நுண்ணரசியல் திரை விமர்சங்களின் தூண்டுதலினால் இப்படி ஒரு விமர்சன பார்வையை முன் வைக்கும் விபரீத ஆசை. இதைத் தொடர்ந்து வாசிக்கும் முன்னர் நீங்கள் ஒரு ரவுண்ட் தமிழ்ப் பதிவுகளில் எப்படி திரைப்படங்களை விமர்சனம் செய்கிறார்கள் என்று பார்த்து விடவும். பதிவைப் புரிந்து கொள்ள வசதியாக இருக்கும்.

ப்ராண்ஸிஸ் ஃபோர்ட் கப்போலா அவர்களே! இந்தப் படங்களைப் பார்க்க நான் $8 டாலரும், சொற்ப நேரமும் செலவு செய்திருக்கிறேன் என்று இப்பொழுதே சொல்லிக் கொள்கிறேன். உனக்கு விமர்சிக்க என்ன தகுதி இருக்கிறது என்று கேள்வி கேட்டுவிடப் போகிறீர்கள்.

'முதல்'கையாக ஒரு விமர்சனம் போட வேண்டும் என்ற ஆர்வத்தில்தான் உட்கார்ந்தேன். பாருங்கள், இது நான் பிறக்கும் முன்னரே வந்துவிட்ட படமாம். சரி விடுங்கள் ஏதோ ஒரு 'கை' பார்த்துவிடுவோம்.

எச்சரிக்கையை மீறி தொடர்ந்து படிப்பேன் என்று நினைத்தால்... நான் என்ன சொல்ல. அனுபவியுங்க. :-)

- அல் பசினோ மூன்ற பாகங்களிலும் மைக்கேல் கார்லியோனாக வருகிறோர். அவரே மூன்று பாகங்களிலும் நடிக்க வேண்டுமா என்று கேள்வி எழுகிறது. ஒரு 40-50 வயது பாத்திரம் என்றாலும் சரி. 70 வயது வேடமெல்லாம் எதற்கு ஏற்க வேண்டும்? கதைக்கு இது தேவையா? சூடான், அல்ஜுமாய்ன், எக்ஸிமோ படங்களில் எல்லாம் இப்படியா எடுக்கிறார்கள்? இது பார்த்தே ஆக வேண்டிய படம் என்றெல்லாம் சொல்லாதீர்கள். பாவம் அவர் உழைப்புக்காக ஒரு 50 வெள்ளிகள் மணியார்டர் செய்து விடுங்கள். விலாசம் தெரியவில்லையென்றால் தனியாக மின்னஞ்சலில் தொடர்பு கொள்ள வேண்டுகிறேன்.

- மர்லன் பிராண்டோ ஏதோ பஞ்சு உருண்டைகளை வாய்க்குள் வைத்து புதிதாக மேக்கப் போட்டிருக்கிறார். சரியான திராபை. நம்ம ஜெய்சங்கர் மையினால் மீசை வரைந்து கொண்டு எவ்வளவு இயல்பாக சிஐடி சங்கராக துப்பறிகிறார்?

- வீடோ கார்லியோன் இத்தாலியிலிருந்து கப்பலில் 1900-ம் வருடம் ந்யூயார்க் வந்து சேர்கிறார். அந்தக் காலத்தில் இத்தாலியர்கள் எப்படி சிகையலங்காரம் வைத்திருந்தார்கள் என்பது விவாததுக்குரியது. அது இடது வகிடா, வலது வகிடா என்று இன்னமும் சந்தேகங்கள் இருக்கின்றன. கதை 'மரியோ பூசோ' என்று டைட்டிலில் போடுகிறார்கள். அவர் ஒருவர் மட்டும் உட்கார்ந்து எழுதினாரா, இல்லை அவர் சொல்லச் சொல்ல இன்னொருவர் எழுதினாரா, இல்லை ஒரு குழுவாக உட்கார்ந்து கொண்டு ஆளுக்கு பத்து பக்கம் கதை எழுதினார்களா என்று தெரியவில்லை. இப்படி கிரடிட் போட்டுக் கொள்வதுதான் அப்போதைய ட்ரெண்ட் போல. தொடர்ந்து பார்த்ததில் தலைவலிதான் மிச்சம். மூன்று முறை பார்த்த பின்னரும் தலைவலி விட்டபாடில்லை.

- அல்பசினோ டயபடிக் அட்டாக்கினால் தள்ளாடி கீழே விழுகிறார் பாருங்கள். இப்படியா நடிப்பது? எஸ்பிரஸ்ஸோ காபி குடிக்கும் இத்தாலிய டான் -க்கு எப்படி சர்க்கரை நோய் வரும்? வந்தாலும் ஒரு கையை தூக்கிக் கொண்டு மல்லாக்க விழுந்திருந்தால் இயல்பாக இருந்திருக்கும். குலுங்கி குலுங்கி அழவும் இல்லை... நமக்கு 'இன்ஸ்டியுட்யூட்' நண்பர்கள் பலருடனும் பழக்கம் உண்டு. இதெல்லாம் ஒரு நடிப்பே இல்லை என்று அடித்து சொல்லமுடியும்.

- வீடோ கார்லியோன் ந்யூயார்க்கில் குடக்கூலி மேட்டருக்கெல்லாம் கட்டப் பஞ்சாயத்து செய்து வைக்கிறார். அமெரிக்க வாழ் இத்தாலியர்களுக்கு குடக்கூலியா பிரச்சினை? இது கூட தெரியவில்லை மரியோ பூசோவிற்க்கு.

- அன்னை மேரியை ஊர்வலமாக தூக்கிக் கொண்டு வருபவர்கள் ஜோயி ஜாஸாவின் மெய்காப்பாளனை சுடுகிறார்கள். கெட்டவர்களை தெய்வம் நின்று கொல்லும் என்று சொல்ல வருகிறார்களா? அப்படியே அங்கே ஒரு சர்ச்சை கட்டி திறப்பு விழாவிற்க்கு ஜெர்மன் சான்ஸ்லரை கூப்பிட்டிருக்கலாம்.

- வீட்டோ ஆண்டாலினோ அமெரிக்கா வந்திறங்கியவுடன், வீட்டொ கார்லியோனாக ஆகி விடுகிறார். ஆண்டாலினோ ஏன் கார்லியோனாக ஆக வேண்டும்? பெயரை மாற்றி மாற்றி சொல்லிப் பாருங்கள். கார்லியோன், ஆண்டாலினோ இணைந்து காண்டேலா-வாக வருகிறதா? கதை அமெரிக்காவிற்கு வந்தவுடன் காண்டேலா ரைஸ் வந்து விடுகிறார் பாருங்கள். (35 வருடத்திற்கு முன்னர் அவர் ஏதாவது பள்ளியில் படித்துக் கொண்டிருக்க மாட்டாரா என்ன?) அப்பட்டமான இத்தாலிய, அமெரிக்கீய கொழுப்புதானே இது.

- வீட்டோ, சோன்னி, மைக்கேல், கார்னி என்று கார்லியோன் குடும்பப் பெயர்களைப் இணைத்துப் பார்த்தால் கிறிஸ்துவீன் சீடர்கள் பெயர்களுக்கும் இதற்கும் உள்ள தொடர்பு தெரிகிறதா? (ஹி..ஹி.. இதப் பத்தி தனியாவே ஒரு பதிவு போட்டுடலாம்)

ராபர்ட் டி நீரோ இரண்டாம் பாகத்தில் வருகிறார். மூன்றாம் பாகம் முழுவதும் அல் பசினோதான். அவர்களின் ரசிகர்கள் அந்தப் படங்களின் வசூலைப் பற்றி எப்படி அடித்துக் கொண்டார்கள் என்ற விவரங்களைத் தேடிக் கொண்டிருக்கிறேன். :-)

அடுத்த வாரம் ஒரு நல்லபடத்தின் அறிமுகத்தோடு சந்திக்கிறேன்.