ஒருபக்கம்: இட்லிவடை, சீன திரைப்படம் மற்றும் ரியாலிட்டி ஷோக்கள்

பதிவு எழுதத் தொடங்கிய இந்தச் சிறு காலகட்டத்தில், சில பதிவர்களுடன் நேரிலும், சாட்டிலும் அளவளாவும் வாய்ப்புகள் அமைந்தது. எல்லா பதிவர்களுடனும் பேசியதில் பொதுவான ஒரு சப்ஜெக்டாக இருந்தது 'யார் இந்த இட்லிவடை?'. இந்த வாரம் ட்விட்டரிலும் சிலர் இதைப் பேசிக் கொண்டிருந்தார்கள். சொல்ல முடியாது. இட்லிவடையேக் கூட இந்தக் கூட்டத்தில் இருந்து கொண்டு 'இவரா', 'அவரா' என்று கும்மியடித்துக் கொண்டிருக்கலாம். கடைசியில் இட்லிவடை என்பது ஒரு குழு மற்றும் அதில் இருப்பது 'கோயிஞ்சாமி' கூட்டம்தான் என்று முடிவாகச் சொல்லிவிட்டார்கள். அட யாருப்பா அந்த 'கோயிஞ்சாமி'?

இம்மாதிரியாக மறைந்து உறைய இணையம் சுவாரசியமானதொரு இடம்தான். இட்லிவடை இன்னமும் எவ்வளவு காலம் தாக்குபிடிக்கப் போகிறார்? Stay tuned!

சில வாரங்களுக்கு முன்னர் பார்த்த சீன மொழிப் படம் - 'காமம், எச்சரிக்கை' (Lust, Caution). விக்கிபீடியா பல சுவாரசியமானத் தகவலை தருகிறது இந்தப் படத்தைப் பற்றி. இரண்டாம் உலகப் போர் காலத்தில் ஹாங்காங் மற்றும் ஷாங்காயில் ஜப்பானிய ஆக்கிரமிப்புக்கு எதிரான புரட்சியை பின்புலமாக கொண்டு பின்னப்பட்ட கதை. ஹாங்காங்க் கல்லூரியில் படிக்கும் சில மாணவர்கள் Kuang Yu Min தலைமையில் புரட்சி நாடகம் நடத்துகிறார்கள். Wang Chia Chi என்னும் பெண் அவனால் ஈர்க்கப்பட்டு அந்த கூட்டத்தில் சேர்கிறாள். தொடர்ந்து ஒரு ரகசியப் புரட்சிப் படை அமைத்து சீன போம்மை அரசாங்கத்திற்கு எதிராக ஒரு கொலை சதித் திட்டம் தீட்டுகிறார்கள். அவர்களின் குறி சீனத் தேச துரோகி என்று நம்பப்படும் Yee. சியா சி-தான் அதில் முக்கியமானவள். அவள் யீ-யின் மனைவியுடன் நெருக்கமாகிறாள். தொடர்ந்து யீ-யை நெருங்கி, அவரை மயக்கி புரட்சியாளர்கள் பாசறைக்கு கொண்டு வர வேண்டும் என்பது திட்டம். முதல் திட்டம் படு தோல்வி. யீ ஷாங்காய் சென்று விடுகிறார். புரட்சியாளர்கள் குறிக்கோள் வெளியே தெரிந்துவிட ஒரு கொலை நிகழ்கிறது. புரட்சிப் படை சிதறுகிறது. மூன்று வருடங்கள் கழித்து மீண்டும் ஷாங்காயில் சியா சி-யும் குவாங்க்-ம் சந்திக்கிறார்கள். இப்பொழுது குவாங்கும் நண்பர்களும் ஒரு பெரிய ஒழுங்கமைக்கப்பட்ட புரட்சி அமைப்பின் அங்கம். புரட்சி அமைப்பை நசுக்கும் போலிஸ் படைக்கு தலைமையேற்றுக் கொண்டிருக்கும் யீ அவர்களுக்கு பெரும் தலைவலி. மீண்டும் சியா சி-யை தூண்டிலாக உபயோகித்து யீ-யை அகற்றிவிட திட்டம் தீட்டுகிறார்கள்.

எதிர்பார்த்தபடி யீ வலையில் விழுகிறார். ஆனால் சியா சி-யும் வலையில் விழுகிறாள். யீ-யை காதலிக்கும் அவள் நடிப்பு அவளையறியாமலேயே அவளை விழுங்குகிறது. ஒரு கட்டத்தில் அவள் புரட்சி அமைப்பின் தலைவரிடம் புலம்புகிறாள் 'அவன் என் உடம்பை மட்டுமல்ல என் மனதையும் தனது பாம்பு கரங்களால் வளைத்து விழுங்குகிறான்'. இறுதியில் புரட்சிப் படை ஜெயித்ததா? யீ தப்பித்தாரா? சியா சி என்னவானாள்? என்று உச்சக்காட்சிகளில் சொல்லப்படுகிறது. மிக நேர்த்தியாக எடுக்கப்பட்ட படம். போர்ப் படத்திற்குண்டான துப்பாக்கி, டாங்கி, குண்டு பொழியும் விமானங்கள் போன்றவை இல்லாமலேயே அந்தப் போர்காலத்தை கண் முன்னே நிறுத்திவிடுகிறது. கல்லூரி மாணவர்கள் அமைக்கும் அமெச்சூர் புரட்சிப் படையின் நடைமுறை சிக்கல்கள் அழகாக சொல்லப் படுகின்றன. பெரிய சிக்கல் சியா சி-யின் கன்னித் தன்மை. அவள் Mrs. Mak என்றுதான் யீ-யின் குடும்பத்திற்கு அறிமுகமாகிறாள். யீ-யை மயக்கி அவருடன் உறவு கொள்ளும்போது உண்மை தெரிந்துவிடுமே. குவாங்க்-ம் சியா சி-யும் ஒருவரை ஒருவர் மறைமுகமாக விரும்பினாலும், சியா-வின் கன்னித்தன்மையை அகற்றும் பொறுப்பு இன்னொரு அனுபவம் வாய்ந்த நண்பனிடம் கொடுக்கப் படுகிறது. அடுத்து ஷாங்காயில் யீ-யை ரகசியமாக சியா சந்திக்கும் போது அவர் மிருகத்தனமாக அவளை அடைகிறார். தொடர்ந்து சந்திப்புகளில் யாரையும் நம்பாத யீ சியா சீ-ஐ பரிபூரணமக நம்புகிறார். காதல் காட்சிகள் சூடாக படமாக்கப்பட்டிருக்கின்றன. மொத்தம் பத்து நிமிடங்களுக்கு படம் முழுவதும் யீ-யும் சியா-வும் காதல் செய்கிறார்கள். அதைப் படமாக்க கிட்டத்தட்ட 100 மணி நேரம் செலவழித்தார்கள் என்று விக்கி சொல்கிறது. ஷாங்காயில் நகைக்கடை நடத்துபவராக நமது பாலிவுட் நடிகர் அனுபம் கேர் வருகிறார். அவருக்கு உதவியாக Vijay Raaz-ம் வருகிறார். சீன மொழியில் இந்த தலைப்பு சிலேடையாக இருக்கிறது. அதாவது மாண்ட்ரீனில் (Mandarin - சீன மொழி) காமத்திற்கும், நிறத்திற்கும் ஒரே எழுத்துதான். அதேபோல் எச்சரிக்கைக்கும் மோதிரதிற்கும் ஒரே வார்த்தை. இதன் தலைப்பு 'வண்ண மோதிரம்' என்றும் சொல்லலாம். யீ-யை கொல்ல சியா சீ குறிக்கும் நாளில் யீ அவளுக்கு ஒரு மோதிரம் பரிசளிக்கிறார்.

சோனி டிவியில் சில வருடங்கள் முன்னர் சூப்பர் சிங்கர் போல ஒரு புதிய குரல் தேடல் போட்டி நடத்தினார்கள். ஜாவேத் அக்தர், ஷங்கர் மகாதேவன் போன்ற பெரிய தலைகள் எல்லாம் பங்கேற்று பல வாரங்கள் ஓடிய நிகழ்ச்சி. அதுதான் நான் பார்த்த முதல் ரியாலிட்டி நிகழ்ச்சி. தற்போது தமிழ் சேனல்களிலே பற்ப்பல நிகழ்ச்சிகள் நடக்கின்றன. ஆனால் ரியாலிட்டி நிகழ்ச்சிகளுக்கு அடிப்படையான பார்வையாளர் பங்கேற்பு அதிகபடுத்துதல் நிகழ்வதில்லை. அதாவது பார்வையாளர்கள் பார்க்க மட்டும் செய்யக் கூடாது. நிகழ்ச்சியின் போக்கை தீர்மாணிக்கவும் வேண்டும். அதுவே ரியாலிட்டி ஷோக்களின் வெற்றி. Bruce Almighty படம் ஒரு சிறந்த உதாரணம்.

தற்போது விஜய் டிவியில் சூப்பர் சிங்கர் நிகழ்ச்சி சுவாரசியமான கட்டத்தை எட்டியிருக்கிறது. 20 பங்கேற்பாளர்கள்தான் எஞ்சியிருக்கிறார்கள். சின்மயி மிகச் சிறந்த தொகுப்பாளராக பரிமளிக்கிறார். நான் ரசித்தது மால்குடி சுபாவின் உற்சாகமான ப்ரெசென்ஸ். Such a Bubbly Charcter she is.