அலெக்ஸா வரிசைப்படுத்துதலும், பிரபஞ்ச சக்தியும், ஆமீர்கானும்

ஆரக்கிள் நிறுவனம் தன்னுடைய OpenWorld சந்திப்பை இந்த வருடம் சான் பிரான்ஸிஸ்கோவில் நடத்துகிறது. நீங்கள் ஒரு பிரபல பதிவரா, அப்படியென்றால் சகாயவிலையில் கான்பிரண்ஸ் பாஸ் கிடைக்க வாய்ப்பிருக்கிறது என்றார்கள். பல்வேறு தளங்களில் எல்லாரும் வளைத்து வளைத்து எழுதும் இத்தனை பதிவுகளை எப்படி வரிசைப்படுத்தி பிரபலமானதை கண்டுபிடிக்கிறார்கள் என்று ஆராய்ந்ததில் சில பல புதிய விசயங்கள் தெரிந்தன. கூகுள் ரீடர் மூலம் உங்களை எத்தனை பேர் படிக்கிறார்கள் என்று குத்துமதிப்பாக அறியலாம். உங்கள் பதிவு ஓடையை Feedblitz போன்ற RSS aggregators மூலம் ஒழுங்குபடுத்தி எத்தனை சந்தாதரர் இருக்கிறார்கள் என்று பார்க்கலாம்.

ஓரளவுக்கு பிரபலமான முறை அலெக்ஸா வரிசைபடுத்துதல் . உங்களில் பலர் இதனைப் பற்றி அறிந்திருக்கலாம். எந்த தள முகவரியைக் கொடுத்தாலும் உடனே கடந்த வாரம், கடந்த மூன்று மாதததிற்கான ஹிட் ரேட் என்று படமாகவே காட்டுகிறார்கள். வலைத்தளத்திற்கு கிடைக்கும் ஹிட்களை வைத்து தரவரிசைப் படுத்தி கிராஃப் போடுகிறார்கள். அட, எப்படி இவர்களால் எல்லா தளத்தின் பிரபலத்தையும் கண்டறிய முடிகிறது என்று கொஞ்சம் துருவிப் பார்த்தால், அலெக்ஸா டூல்பார் என்று ஒரு உபகரணப் பட்டி (தமிழுங்கோ) வைத்திருக்கிறார்கள். இதை நீங்கள் தரவிறக்கி உங்கள் உலாவியில் இணைத்து விட வேண்டும். இந்த பட்டி நீங்கள் உலாவும் தளங்களைப் பற்றிய விவரங்களை அலெக்ஸாவின் டேட்டாபேஸில் கொண்டு சேர்க்கிறது. இந்த தகவல்களை அடிப்படையாகக் கொண்டுதான் இதன் வரிசைப்படுத்துதல் நிகழ்கிறது. அலெக்ஸாவின் உபகரண பட்டி இல்லாதோரின் உலாவல் வரலாறு இதில் கணக்கெடுத்துக் கொள்ளப்படுவதில்லை. அதாவது இந்த தரவரிசை சார்புடையவையாகத் (biased) இருக்கிறது. ஆகையால் அலெக்ஸாவைப் பற்றிய அதீத மதிப்பீடுகள் கொள்வது தேவையில்லை என்றுதான் தோன்றுகிறது.

நமது தளத்தைப் பற்றிய தரவரிசையைப் பார்க்கலாம் என்று அலெக்ஸாவில் துழாவினால், ஒன்றும் சொல்லிக் கொள்கிற மாதிரி இல்லை. 'தம்பீபீ! நீ போக வேண்டிய தூரம் நிறைய இருக்குப்பா' என்று கொஞ்சம் ஈனோ சாப்பிட்டு என்னை நானே ஆற்றுப்படுத்திக் கொண்டேன். முழுத் தகவலையும் பார்த்தால், இந்தப் தளத்தின் பார்வையாளர்கள் இந்தியா மற்றும் சிங்கப்பூரிலிருந்து மட்டும்தான் வந்திருக்கிறார்கள். அப்போ அமீரக, புதரக மக்கள் யாருமே இந்த வலைத்தளத்தை சீந்துவதே இல்லையா? வலைத்தளத்திற்கே வராமல் பின்னூட்டம் மட்டும் போட்டுவிடுகிறார்கள்ப் போல.

அலெக்ஸாவில் உங்கள் தரவரிசையை முன்னேக் கொண்டு வர இதோ 20 டிப்ஸ்கள். மிக எளிய வழிமுறை. அலெக்ஸா டூல்பாரை நீங்கள் உபயோகிக்கும் எல்லாக் கணிணிகளையும் நிறுவிக் கொண்டு வலைப்பக்கத்தை உலாவி முகப்பு பக்கமாக வைத்துக் கொண்டு அதன் வழியாகவே மற்ற தளங்களுக்கு சென்று உங்கள் வலைத்தளத்தின் ஹிட் ரேட்டை கன்னா பின்னாவென்று ஏற்றிவிடுங்கள். உங்கள் நண்பர்களும் அலெக்ஸா டூல்பார் வைத்துக் கொண்டு உங்கள் தளத்தை மேய்ந்தால் ரேங்கிங் எக்குதப்பாக உயர வாய்ப்புண்டு. வாழ்க வளமுடன்!

Da Vinci Code புகழ் டான் ப்ரௌன் எழுதிய புனைவு Angels and Demons. இது இப்பொழுது டாம் ஹாங்க்ஸ் நடிக்க திரைப்படமாகவும் எடுக்கப்பட்டு வருகிறது என்று அறிகிறேன். ஒரு கால் கிராம் அ-பருப்பொருள் (anti matter) பற்றிய கதை. மிகவும் அருமையான சஸ்பென்ஸ் த்ரில்லர். இதில் வரும் கார்லோ வெண்டிரஸ்கா (Carlo Ventresca) வாடிகனின் புனித ரோமானிய சர்ச்சின் அலுவலர் (Camerlengo). இவர் பெரும் பேச்சாற்றலுடையவர். சிறு வயதானவர். கதையில் பின்னர் அறியப்படுகின்ற கார்லோவின் பிறப்பைப் பற்றிய இரகசியம் மிகவும் வியப்பிலாழ்த்தும் கற்பனை. ஆண்டி மேட்டரும், மேட்டரும் மோதினால் பேரழிவு ஏற்படும். இல்லுமினாட்டி (Illuminati) என்னும் அடிப்படைவாத குழுவால் இந்த ஆண்டிமேட்டர் வாடிகன் சர்ச்சில் மறைத்து வைக்கப்படுகிறது. 24 மணிநேரம் அந்த அ-பருப்பொருள் வேக்வூம்-ல் (vaccum) மிதந்து கொண்டிருக்கும். அப்புறம் தரையிறங்கி பருப்பொருளோடு மோதினால் பேரழிவுதான். அந்த அபாயத்திலிருந்து உலகை காப்பாற்ற கதாநாயகன் ராபர்ட் லாங்க்டனோடு முயல்கிறார். இறுதியில் என்னவாயிற்று என்று புத்தகத்தைப் படித்து தெரிந்து கொள்ளுங்கள். தற்போது CERN நடத்தும் Particle accelerator சோதனைக்கு முன்னோடி போல் இந்தக் கதை அமைந்திருந்தது. இதற்கு அப்புறம்தான் பிரசித்திப் பெற்ற Da Vinci Code புனைவு எழுதப்பட்டது.

நேற்றைய நிலவரப்படி CERN-ன் LHC (Large Collidor of Hadrons) சோதனை ஒத்திவைக்கப்பட்டிருக்கிறது. இந்த சோதனையினால் புதிய சக்தியை உண்டாக்க முடியும் என்று நம்புகிறார்கள். இந்த சோதனைக்கு எதிர்ப்பாளர்கள் முன் வைக்கும் வாதங்கள் சில இதன் அடிப்படையையே கேள்வி கேட்கின்றன. இந்த சோதனையின் விளைவு இப்படித்தான் இருக்கும் என்று அறுதியிட்டு சொல்ல முடியாத நிலைதான் இப்பொழுதும். ஆனால் ஒன்று நிச்சயம். இது வெற்றிபெற்றாலும் சரி தோல்வி அடைந்தாலும் சரி இது ஒரு disruptive சோதனைதான். எனக்கு தோன்றிய இரு முக்கிய கேள்விகள்.

1. Law of conservation of energy தவறா?
2. இந்த சோதனை மூலம் பிறக்கும் புதிய சக்திக்கு என்ன பெயர் வைப்பது?

பள்ளியில் படிக்கும்போது ஆமீர்கானின் முதல் படம் தமிழகத்தில் ஓடி பெருவாரியான வெற்றி பெற்றது. ஷாருக்கான் அப்பொழுது டிவி சீரியலில் உற்சாகம் பொங்க நடித்துக் கொண்டிருந்தார். ஆமீர்கானின் சில திராபை படங்களை விடுத்தால் பெரும்பாலும் நல்ல படங்களாகவே தந்திருக்கிறார். இவருடைய 'லகான்' மேல் தனிப்பட்ட விமர்சனங்கள் இருந்தாலும், அதை மிகத் திறமையாக லாபி செய்து அகாடமி விருதின் இறுதிக் கட்டம்வரை கொண்டு சென்றது இந்திய சினிமா அளவில் சாதனைதான். இந்த வருடம் 'தாரே ஜமீன் பர்' இந்தியப் படங்கள் சார்பில் அகாடமி அவார்டுக்கு செல்கிறது. இந்தப் படம் மிகச் சீராக, இந்திய பார்வையாளர்களுக்கு ஏற்றவாறு கொஞ்சம் டிரமடைஸ் செய்து எடுக்கப்பட்ட படம். படத்தில் எனக்குப் பிடித்த காட்சி ஆசிரியரான ஆமீர்கான் தனது மாணவனின் பெற்றோரை சந்தித்து 'டிஸ்லெக்சியா' குறைபாட்டைப் பற்றிப் புரியவைக்கும் காட்சி. மேண்ட்ரீன் மொழியில் எழுதியதைப் படிக்க முடியாமல் திணறும் தந்தைக்கு தன் மகனின் பிரச்சினைப் நேரடியாகப் புரிகிறது. முற்பாதி இன்னமும் அழுத்தமாக இருந்திருக்கலாம். பிற்பாதியில் அசட்டு ஆசிரியர்களின் நகைச்சுவையை தவிர்த்திருக்கலாம். அருமையான படத்திற்காக ஆமிர்கானுக்கு ஒரு பொக்கே. இவர் வலைத்தளத்தின் நுழைவு வாயிலில் இவர் கஜினி பட ஸ்டில்தான் இருக்கிறது. இன்னமும் இவர் மெமெண்டோ பார்க்கவில்லையா?