நேரத்தின் வரலாறும், புதிர்பிரதேசமும், கவுண்டமணியும்

மனித இனத்தின் மகத்தான அறிவியலாளர்களாக சொல்லப்படுபவர்கள் மூன்று பேர். கலிலியோ, ஐசக் நியூட்டன் மற்றும் ஐன்ஸ்டீன். நமது காலகட்டத்தில் இவர்களுக்கு இணையான ஒரு அறிவியலாளராக சொல்லப்படுபவர் ஸ்டீஃபன் ஹாக்கிங். உடல் முழுவதும் பக்கவாதத்தால் பாதிக்கப்பட்ட ஹாக்கிங் தற்போது வாழ்வதும் பேசுவதும் தொழில்நுட்ப சாதனங்களின் மூலமாகத்தான். இருபத்தியோரு வயதில் 'இன்னமும் 2-3 வருடங்களே வாழ்நாள் என்று கணிக்கப்பட்டவர் ஏறக்குறைய 40 ஆண்டுகளுக்கும் மேலாக அறிவியலுக்கு அரிய பங்காற்றி வருகிறார். ஹாக்கிங் எழுதிய புத்தகம்தான் 'நேரத்தின் ஒரு சுருக்க வரலாறு' (A brief history of Time).. என்னை மாதிரியான அறிவியல் பாடங்களை வெறுக்கும் சாதாரணர்களுக்கு பல சிக்கலான விசயங்களை எளிதாக சொல்லிக் கொடுக்கும் புத்தகம். இந்த புத்தகம் முழுவதிலும் ஒரே ஒரு இடத்தில்தான் அறிவியல் சூத்திரம் காணப்படும். e = mc^2. மற்றபடி கருந்துளைகள், பெருவெடிப்பு, வெளிச்ச கூம்பு போன்ற பல விசயங்களையும் எளிதாக சொல்லிக் கொடுக்கின்றது. இந்தப் புத்தகத்தைப் படித்தவுடன் நான் எழுதிய ஒரு சின்னக் கதை -"வெடிப்பு".

எல்லையில்லா இந்தப் பிரபஞ்சம் ஒரு பலூனைப் போல விரிவடைந்து கொண்டே போகிறது என்கிறார் ஹாக்கிங். அதாவது புள்ளிகள் இடப்பட்ட பலூனை ஊதிப்பாருங்கள். புள்ளிகள் விரிவடைந்து கொண்டே அதனூடே இடைவெளி அதிகரித்துக் கொண்டே போகிறதா? அப்படித்தான் கிரகங்களும், நட்சத்திரங்களும், கேலக்ஸிகளும் நகர்ந்து கொண்டே போய்க் கொண்டிருக்கின்றன. இதை எப்படி நிரூபிப்பது? என்னுடைய நண்பர் சுவேக் ஒரு அருமையான விளக்கம் கொடுத்திருக்கிறார். அவருடைய அனுமதியோடு அதிலிருந்து ஒரு பகுதி கீழே:

_/`-o0O0o-'\__/`-o0O0o-'\__/`-o0O0o-'\__/`-o0O0o-'\__/`-o0O0o-'\_

மொத்த பிரபஞ்சமும் அதன் அளவில் விரிவடைந்து கொண்டே செல்கிறது என்பதனை சிவப்பு இடமாற்றம் (Red Shift) என்ற ஒரு பரிசோதனை முடிவின் முலம் விளக்குகிறார்கள். எப்போது இந்த விரிவடைதல் முடிவுக்கு வரும், வெடிப்பதற்கு முன்பு எப்படி இருந்தது என்ற மற்ற இரு கேள்விகளுக்கும் விடை காணும் பொறுப்பை தாங்களாகவே எடுத்து கோண்ட ஹாலிவுட் இயக்குநர்கள் இக்கணத்தில் காசு பண்ணுகிறார்கள். சிவப்பு இடமாற்றம் எவ்வாறெல்லாம் பிரபஞ்சம் விரிவடைதலை நிருப்பிக்க உதவுகின்றது ??

சிவப்பு:
இப்பிரபஞ்சத்தில் உள்ள அனைத்து பொருட்களும் ஏதாவதொரு (கருந்துளைகள் தவிர) ஒளி அலைகளை உமிழவோ அல்லது கிரகித்து கொள்ளவோ செய்கின்றன. இதில் நம் கண்ணுக்கு புலனாகும் கண்ணுறு ஒளியானது சிவப்பு முதல் ஊதா வரையிலான அலைநீளத்தை (Wavelength) கொண்டது. அதனிலும் அதிகமாகவோ அல்லது குறைவாகவோ அலைநீளம் உள்ள ஒளிகளை நம் கண்ணால் காண இயலாது. சிவப்பின் அலைநீளமானது ஊதாவை விட அதிகம்.

பூமியை விட்டு விலகி நகரும் ஒரு கிரகத்திலிருந்து வரும் கண்ணுறு ஒளியின் அலைநீளமானது சிவப்பை நோக்கி அதிகப்படியாக விலக்கம் அடைந்து காணப்படுகின்றது. இதனை டாப்ளர் விளைவினை (Doppler's effect) கொண்டு கணக்கிடமுடியும். நம்மிடமிருந்து விலகிச் செல்லும் ஒர் அவசர ஊர்தியின் ஒலி அளவானது குறைந்து கொண்டே செல்வது போல பூமியை விட்டு விலகி நகரும் கிரகத்திலிருந்து வரும் ஒளியின் அலைநீளமானது அதிகப்படியாக சிவப்பை நோக்கி இடம் மாறுவதுதான் சிவப்பு இடமாற்றம். இன்று கணக்கிடப்படும் ஒர் கிரகத்தின் சிவப்பு இடமாற்றம், நாளை மீண்டும் அளவிடப்படும் பொழுது சிறிது அதிகமாகின்றது. தூரம் அதிகமாகும் பொழுது இந்த சிவப்பு இடமாற்றம் அதிகமாகும். அதனால்தான், சூரியன் பூமியிலிருந்து அதிகபடியான தொலைவில் உள்ள காலை மற்றும் மாலை வேளைகளில் சூரிய ஒளியானது இளஞ்சிவப்பு நிறமாக அமைகின்றது.

Hubble விதி:
இதன் முலம்தான் விலகி நகரும் பொருட்களின் ஒளி அலையில் இடமாற்றம் ஏற்படுவதனை நிருபிக்கின்றார்கள். இதனால் இப்பிரபஞ்சத்தில் உள்ள ஒவ்வொரு கிரகமும் தன்னுடைய நிலையிலிருந்து பூமியை விட்டு விலகி விரிவடைந்து கொண்டெ செல்வதாக கூறுகிறார்கள். இவ்வாறுதான் ஒருமித்த கணத்திலிருந்து வெடித்து விரிவடைந்து கொண்டே செல்வதாக நம்பப்படுகின்றது.

_/`-o0O0o-'\__/`-o0O0o-'\__/`-o0O0o-'\__/`-o0O0o-'\__/`-o0O0o-'\_

இப்படியாக விரிவடைந்து கொண்டிருக்கும் இந்த பிரபஞ்சத்தின் ஆயுளை குத்து மதிப்பாக பதிமூன்றரை பில்லியன் ஆண்டுகள் (1370 கோடி ஆண்டுகள்) என்று கணக்கிடுகிறார்கள். அதில் பூமி உண்டாகி ஒரு நான்கரை பில்லியன் ஆண்டுகள் (450 கோடி ஆண்டுகள்) ஆகிவிட்டன. அற்ப ஆயுள்காரனான மனிதன் இந்த பூவுலகை நாசமாக்கிவிட்டான் என்று சொன்னால் சிரிப்புதான் வருகிறது. இந்த பிரபஞ்சத்தின் ஒரு அங்கமாக இருக்கும் மனிதனின் செய்கைகளும் இயற்கையின் அங்கமே. மனிதன் தன்னைக் காப்பாற்றிக் கொள்ளத்தான் இத்தனை பிரயத்தனமும். தற்கால மனிதன் பிரபஞ்சத்தின் ஒரு துளியினைக் கூட முழுவதும் உணரவில்லை. எதிர்கால மனிதன் பிரபஞ்சத்தில் வேறு சில துளிகளை கண்டறியலாம். தன் மூதாதையர்கள் எப்படித்தான் இந்த பூமியில் காலம் தள்ளினார்களோ என்று நமது எதிர்கால சந்ததியினர் வியப்படைவதற்கான சாத்தியங்கள் அதிகமே.


புதிர்பிரதேசம் என்பது அமெரிக்காவின் கலிஃபோர்னியா மாநிலத்தில் சாண்டா க்ரூஸ் என்னும் ஊரில் இருக்கிறது. இது ஒரு முக்கிய சுற்றுலாத்தலமாக இருக்கிறது. சிறிய குன்றை காட்டி இதுதான் புதிர்பிரதேசம் என்று சொல்கிறார்கள். தேர்ச்சிப் பெற்ற வழிகாட்டிகள் பார்வையாளர்களை குழுக்களாக பிரித்து குன்றை சுற்றிக் காட்டிக் கொண்டே பல புதிர்களான செயல்களை செய்து காட்டுகிறார்கள். உதாரணமாக ஒரு பலகையில் பந்தை வைத்து சரிவான பாதையில் உருட்டிவிட்டால் பந்து உருள மறுக்கிறது. எதிர்திசையில் ஏற்றத்தை நோக்கி உருளுகிறது. படத்தைப் பாருங்கள்.
பெரியவர் எப்படி கோனலாக சுவற்றில் ஏறி நிற்கிறார் என்று. இம்மாதிரியான புதிரான முறையில் புவியீர்ப்பு விசையை பொய்யாக்கி பல அனுபவங்களைத் தருகிறது இந்த புதிர்பிரதேசம். எங்கள் கூட வந்த இளம்பெண் வழிகாட்டி பார்வையாளர்களை வரிசையாக நிற்க வைத்து இருப்பதிலேயே குள்ளமானவரை எல்லாரையும் விட உயரமானவராகக் காட்டினார். இது ஒருவகை Forced Illusion என்று சொல்லப்படும் 'தோற்றப் பிழை'யால் தோன்றும் மாயபிம்பம்தான். குன்றில் மேல் கட்டப்பட்டிருக்கும் கோனல் வீட்டின் பின்புலத்தில் நமக்கு எல்லாமே ஒருமாதிரி Skewed-ஆக தெரிகிறது. கானலின் நீரோ? வெறும் காட்சி பிழைதானோ? நானும் ஓர் கனவோ? இந்த ஞாலமும் பொய்தானோ?

சிங்கங்களும், சிறுத்தைகளுமாய் ட்விட்டரில் நிறைய தகவல் பரிமாற்றம் நிகழ்ந்து கொண்டிருக்கிறது. சிறு எலியாய் நானும் ஆங்காங்கே உலவி சில பயனுள்ள தகவல்கள் பெற்றுக் கொண்டிருக்கிறேன். திடீரென்று இந்த வாரம் கவுண்டமணியைப் பற்றிய பல விவாதங்கள். மிகவும் உணர்ச்சிவசப்பட்ட நிலையில் விவாதங்கள் நடந்து கொண்டிருக்கின்றன என்று தெரிகிறது. ஒரு பதிவில் சார்லி சாப்ளினோடு கவுண்டமணியை ஒப்பீடு செய்து எழுதிய பொழுது கொஞ்சம் தடுமாறித்தான் போனேன். உணர்ச்சி வசப்படுதலுக்கும் ஒரு எல்லையில்லையா என்ன? நிற்க!

பதினாறு வயதினிலே போன்ற படங்களிலே நடுத்தர வயது பாத்திரமேற்றி நடித்தவர், பின்னர் சில பத்து ஆண்டுகள் கதாநாயகனுக்கு துணைப் பாத்திரமாக இளமையான நகைசுவை நாயகனாக நிலைத்து நின்றது அவருடைய பெரும் சாதனைதான். கிட்டத்தட்ட அறுபத்தைந்து வயதுவரை கல்லூரி வளாகத்தில் இளமை லூட்டி அடித்துக் கொண்டிருந்தார். மற்றபடி அவரளவிற்கு சக பாத்திரங்களை மிகக் கேவலமாக நையாண்டி செய்தவர் (முக்கியமாக கருப்பு நிறத்தை) யாருமே கிடையாது. முக்கியமாக கவுண்டரின் நடிப்பில் லிமிட்டேஷன்ஸ் அதிகம். சத்தமாக திட்டினால் நகைச்சுவை என்று அர்த்தமா என்ன? சந்திரபாபுவை விட ஒரு திரை ஆளுமைமிக்க காமெடியன் யாரும் இருக்கிறார்களா என்ன? "சபாஷ் மீனா" என்றொரு படம். ரிக்ஷாக்காரனாக வரும் சந்திரபாபு சிவாஜி கனேசனோடு நடிக்கும் ஒரு காட்சி. தள்ளு முள்ளு என்று நடந்துகொண்டிருக்கும் காட்சியில் 'உன் மூஞ்சில என் பீச்சாங்கையை வக்க' என்று பேசிக்கொண்டே எதிர்பாராத நேரத்தில் சிவாஜியின் முகத்தில் நிஜமாகவே அடித்து விடுவார். அது ஒத்திகை பார்க்கப்படாமல் நடித்தது என்று சொல்வார்கள். சிவாஜியின் ரியாக்ஷன் அப்படித்தான் இருக்கும். ஏன், தற்காலத்தில் நச்சு இல்லாத சிறந்த நகைச்சுவைக்கு வடிவேலுவே சிறந்த உதாரணம். அவருடைய பல வசனங்களின் வீச்சு மிக அதிகம். சரி விடுங்கள். அவரவர் அரசியல் அவரவர்க்கு.