November 15, 2009

நிமித்தகாரன்


15-நவ-2009

காட்சி - 1

இருட்டுப் பின்னணியில் சுருள் சுருளாகப் வெண்மையானப் புகை பரவுகிறது. ஒரு கட்டு நிறைய ஊதுவத்தி கொளுத்தியது போல் திரையில் ஆங்காங்கே புகை புறப்பட்டு பரவ, தொடர்ந்து மெலிதாக வெளிச்சம் திரையில் விரவி அந்தப் பெண்ணின் முகம் தெரிகிறது. பார்த்தவுடன் பற்றிக் கொள்ளும் உற்சாக சிரிப்பு. அழகாக தலையசைத்தவாறே ஏதோ பேசுவது தெரிகிறது. ஆனால் சத்தம் கேட்கவில்லை. பின்னணியில் மெல்லிய பியானோ இசை ஒலிக்க, அந்த அழகி பேசிக் கொண்டே காமெராவை நோக்கி சற்றே முன்னே வருகிறாள். ஓர் அதிர்வுடன் திரையில் அலைஅலையாக பரவி காட்சி கலங்கி சட்டென்று புள்ளியாக அடங்கி இருட்டாகிவிடுகிறது. பின்னணியிலிருந்து ஒரு குரல் ஒலிக்கிறது

பின்னணி குரல்: ’இதாங்க என் பிரச்சினை. இந்தப் பெண்தான். யார் இவள், என்ன சொல்ல வருகிறாள்னு எதுவும் தெரிய மாட்டேங்குது. இந்தக் கனவு மட்டும் அடிக்கடி வருது. ஆனா ஒண்ணு. இந்தப் பெண் ஏற்கெனவே அறிமுகமான மாதிரி, ரொம்பவே பழகின பெண்ணா தெரியறா. எங்கே, எப்படி சந்திச்சேன்னு தெரியல. இந்தக் கனவும் அரைகுறையா அறுந்து போன மாதிரி நின்னுடுது. கடைசிவரைக்கும் அவள் என்னமோ சொல்ல வர்றது தெரியுது. என்ன சொல்றான்னே கேக்க மாட்டேங்குது. இன்னும் கொஞ்சமே கொஞ்சம் நேரம் கனவு தொடர்ந்திருந்தா அவள் கிட்ட்த்தில வந்து என்னமோ கேக்கறது விளங்கிருக்கும். இப்படி பலவருசமா என் கனவுல தொடர்ந்து வந்திட்டிருக்கா’

காட்சி - 2

இப்பொழுது மீண்டும் ஒளி வர திரையில் ஒரு மேஜை தெரிகிறது. அதன் மேல் பல அடுக்குகளில் நோட்டு புத்தகங்கள் அடுக்கி வைக்கப்பட்டிருக்கின்றன. மேஜைக்கு பின்னால் உயரமான நாற்காலியில் ஒரு வயதானவர் உட்கார்ந்திருக்கிறார். கறுப்பு நிறத்தில் பளப்பள சட்டை அணிந்திருக்கிறார். நடுவில் ஒரு வெண்ணிற சில்க் டை. காமிராவைப் பார்த்து புன்முறுவலிக்கிறார். மேஜை மேல் ஒரு சாய்வானப் பெயர்பலகையில் ‘நிமித்தக்காரன்’ என்று எழுதியிருக்கிறது. பின்னணியில் முழுவதும் புத்தக அலமாரிகளாக இருக்கிறது. அவர் கண்களைத் திறந்து முறுவலிக்கிறார்.

நிமி: அந்தப் பெண் மட்டும்தான் தெரியறாளா? கூட வேற ஏதாவது தெரிகிறதா?
இப்பொழுது மேஜைக்கு இந்தப்புறம் அமர்ந்திருக்கும் இளைஞன் திரையில் தெரிகிறான். கண்களில் ஆர்வத்தோடு உட்கார்ந்திருக்கிறான்.

இளை: இல்ல.

நிமி: எவ்வளவு நாளா இந்தக் கனவு வருது?

இளை: பல வருசமா. ஒரு எட்டு-பத்து வருசம் இருக்கும்.

நிமி: ஓ... (உடலைக் கொஞ்சம் முன்னே நகர்த்தி அவனை ஊன்றி பார்த்துவிட்டு) அப்ப ஒரு பதினெட்டு வயசுலேர்ந்து இந்தக் கனவு வருது?

இளை: ஆங்... இருக்கும்.

நிமி: அந்தப் பொண்ணப் பாத்தவுடன என்னான்னு தோணுது? ஒளிக்காம சொல்லுங்க. டாக்டர்கிட்டயும் வக்கீல்கிட்டயும் கூட பொய் சொல்லிப்பிடலாம். நிமித்தகாரங்ககிட்ட பொய் ஆவாது.

இளை: (கொஞ்சம் வெக்கப்பட்டுக் கொண்டு) பாத்தவுடன ரொம்ப புடிச்சுப் போனா மாதிரி தோணுது. பேசனும்... பழகனும்... (இன்னும் கொஞ்சம் தயங்கிவிட்டு) கலியாணம் பண்ணா இவளத்தான் பண்ணனும்கிற மாதிரி தோணுது. (சட்டென்று ஆர்வமாகி) உங்களால அந்தப் பெண்ணைக் கண்டுபிடிச்சிற முடியுமா?

நிமி: (புன்னகைத்துவிட்டு) அதுக்குத்தானே நான் இருக்கேன்.

இளை: அது எப்படி என் கனவில் வந்த பொண்ணை நீங்க கண்டுபிடிப்பீங்க?

நிமி: ஹ..? என் தொழிலே அதுதானே. பாருங்க இந்த நோட்டுபுத்தகமெல்லாம்... எல்லாம் கனவுகளைப் பத்தின ரெக்கார்டுதான். (காற்றில் படுக்கைவாட்டில் ஒரு நீளக்கோடு வரைகிறார்). உங்கமாதிரி சராசரி மனுசங்க வாழ்க்கை இப்படித்தான் நேர்க்கோட்டுல போகுது. (கற்பனைக் கோட்டுக்கு மேலே கீழே என்று ஆங்காங்கே வட்டம் வரைகிறார்) இதுதான் உங்க கனவுகள். நீங்க சராசரி வாழ்க்கையிலேர்ந்து விலகி அந்த மேகத்துல உலவும்போது ஏற்படறதுதான் கனவு. கனவு கலையும்போது உங்க சராசரி நேர்க்கோடு வாழ்க்கைக்கு வந்திடறீங்க. ஆனா நிமித்தக்காரர்கள்? மேகத்திலேயேதான் இருக்கோம். அங்கேயே உலவறோம். பயணம் செய்யறோம். அப்பப்போ கீழே இறங்கி உங்க நேர் வாழ்க்கைக்கு... அதாவது உங்களுக்கு நேரா இருக்கிற மாதிரி தோற்றம் தர்ற வாழ்க்கைக்கு வந்து உரையாடறோம். (முன்னேயிருக்கும் நோட்டுக்களை காண்பிக்கிறார்)பாருங்க உங்கள மாதிரி நிறைய பேரோட கனவுகள் இங்க இருக்கு.

இளை: (கொஞ்சம் சந்தேகமாக) பெருசா என்னல்லாமோ சொல்றீங்களே. கனவுனா எப்பவும் கற்பனைதானே. இந்தப் பொண்ணு எங்கியோ நேர்ல பாத்த மாதிரியே இருந்திச்சு. அதான் கேட்டுக்கலாம்னு வந்தேன்.

நிமி: என்னாது? (ஒரு இளக்காரச் சிரிப்பு சிரித்துக் கொண்டு) கனவுன்னா கற்பனையா? (கண்களை மூடிக்கொண்டு மூச்சை உள்ளிழுத்து மெதுவாக விடுகிறார். கண்களைத் திறந்து தீர்க்கமாக அவனைப் பார்த்துக் கொண்டு) கனவுகள்லாம் புதிர் ஐயா. நம்ம வாழ்க்கையைப் பற்றின ரகசியம் அவை. இந்த பிரபஞ்சத்தைப் பற்றின பல அறியப்படாத உண்மைகள் கனவுகள்லதான் இருக்கு. என்ன அதெல்லாம் சமிக்ஞைகளாக சொல்லப்படுது. அதைப் புரிஞ்சிக்க கொஞ்சம் திறமையும் பயிற்சியும் வேணும். அவ்வளவுதான்.

இளை: சமிக்ஞாவா? எதுவும் சினிமா நடிகையா?

நிமி: (அவனையே சில விநாடிகள் உறுத்துப் பார்க்கிறார். பிறகு மெலிதாக் புன்முறுவலித்து விட்டு) சமிக்ஞைன்னா சங்கேத மொழிப்பா. கனவுகளில் பலவகை உண்டு. பேரரசன் சாலமன் கனவிலேதான் ஞானத்தைப் பெற்றான்.

இளை: சாலமன் பாப்பையாவா? பட்டிமன்றத்துல...

நிமி: (அந்தக் கேள்வியை இடைவெட்டிக் கொண்டே) கனவுகளில் தோன்றுவது எல்லாம் குறியீடுகள். உன் கனவில பூனை வந்தா உனக்கு எதிரிகள் உருவாயிட்டாங்கன்னு அர்த்தம். ஒட்டகம் வந்தா பெரிய செல்வம் கிடைக்கப் போகுது. அதேது நண்டு வந்தா love is brewing somewhere. ’நண்டுபிடி’ங்கிறது அதுதானே(சிரிப்பு). கனவில் வரும் இருட்டு எப்பவும் தனிமையையும், மாறுதலையும் குறிக்குது. சிற்சில உரசல்களின் போது ஏற்படும் சங்கட உணர்ச்சியைக் காட்டுது. வெள்ளை நிறம் உத்வேகத்தை குறிக்குது. ரோஜா நிறம் காதலைக் காட்டும். கனவுகளில் ஒருவர் படிகளில் ஏறிப் போற மாதிரி பாத்தா அது எதிர்பார்ப்புகளைக் குறிக்குது. ஓடிக்கிட்டு இருக்கற மாதிரி கனவு வந்தா சுதந்திரம்னு அர்த்தம். வானத்தைப் பாத்தா அளவில்லா சுதந்திரம்...

இளை: இருங்க இருங்க... என் கனவில இது எதுவுமே வரலயே...

நிமி: (சுவாரசியம் தடைபட்ட எரிச்சல் சற்றே தெரிய) அது சரி... ஹ்ம்ம்... உன் கனவுல என்ன வருது... (மேஜையில் நடுவில் இருந்த ஒரு நோட்டு புத்தகத்தை எடுத்து புரட்டுகிறார்)புகை வருது. புகை மயக்கத்தை குறிக்குது. உன் மனசு மயங்கி உணர்வுகள் மங்கிடற நிலைமை. அதனாலக் கூட அந்தப் பெண் சொல்றது கேக்காமப் போயிருக்கலாம். (சிறிது நேரம் கண்களை மூடிக் கொண்டிருந்துவிட்டு) ம்ம்... இதோ அந்தப் பெண்ணைப் பத்தி தெரியுது. இரு... (மேஜையின் இடது பக்கம் ஒன்றிரெண்டு புத்தகங்கள் எடுத்துப் பார்க்கிறார். பின்னர் வலதுபக்கம் ஒரு நோட்டை எடுத்து புரட்டுகிறார்). ஆங்... இதோ அதே கனவு... (பக்கங்களைப் புரட்டுகிறார்) ம்ம்ம்.... (நிமிர்ந்து அவனைப் பார்த்துவிட்டு) ம்ஹ்ம்ம்....

இளை: என்னது? பேர் தெரிஞ்சதா?

நிமி: இரு இரு... (வலது பக்கம் தள்ளி இன்னொரு நோட்டை எடுத்து புரட்டுகிறார்) ஆங்.... இதுதான்... (படபடவென்று புரட்டிப் பார்க்கிறார். அதற்கு அடுத்து இன்னொரு நோட்டு புத்தகம்... இன்னொரு நோட்டு புத்தகம் என்று நகர்ந்து மேஜையின் கடைசியில் ஒரு உயர அடுக்கு நோட்டு புத்தகங்களிடம் வருகிறார். அந்த அடுக்கை ஏற இறங்கப் பார்த்துவிட்டு அவனை நோக்கித் திரும்புகிறார்) இதோ... அவளேதான். அவளேதான் மீண்டும் வந்திட்டா (அந்த உயர அடுக்கை சுட்டிக் காண்பித்து) இது எல்லாம் அவ வந்திட்டுப் போன கனவுகள்தான்.

இளை: (குழப்பமாக பார்த்துவிட்டு) புரியலயே.

நிமி: (செய்யுள் சொல்லும் தொனியில்)

கொம்புளதற் கைந்துமுழம், குதிரைக்குப் பத்துமுழம்
வெம்புகரிக் காயிரம்தான் வேண்டுமே - அம்புவிழி
சித்திரங்கா ஆசை அறியாத தூரத்து
எத்திசையோ செல்ல வழி

(தொண்டையைச் செருமிக்கொண்டு தொடர்கிறார்) அதாவது கொம்புள்ள மாடு முட்டாம இருக்கனும்னா அஞ்சு முழம் தூரத்துல நின்னுக்கலாம். குதிரை உதைக்காம இருக்க பத்து முழம் தூரம் போதும். மதம்பிடிச்ச யானைன்னா ஆயிரம் முழம் தள்ளி நின்னுகிட்டா பாதுகாப்பு. ஆனா சித்திரங்கா ஆசை வச்சிட்டா எங்கேயும் போயிட முடியாது. பல ஆயிர வருடங்களா இருக்கற பாட்டு இது.

இளை: (மெல்லிய குரலில்) இது வேறேதோ தமிழ் செய்யுளோட உட்டாலக்கடி மாதிரி இருக்கே. (இருக்கையில் நன்றாக சாய்ந்துகொண்டு யோசிக்கும் பாவனையில்) சித்திரங்கா? இதான் பேரா? கேள்விபட்ட மாதிரி இல்லயே.. நார்த்தங்கா மாதிரி இருக்கு....

நிமி: இந்த மாதிரி அறியாத, தெரியாத பாடல்கள் ஏகத்துக்கு இங்கே இருக்கு (மேஜையை சுட்டிக் காண்பிக்கிறார்). அவதான் குறுத்தாளாம்புத்தூர் காவல் தெய்வம். தேனீக்கு தென்மேற்குல அஞ்சு மைல்ல இருக்கு குறுத்தாளம்புத்தூர். சுத்துபட்டு அத்தனை கிராமத்திலேந்து வந்து அம்மன் கோவிலுக்கு படையல் போடுவாங்க. சக்தி வாய்ந்த அம்மன் கோவில். அங்கதான் சித்திரங்கா தேவி காவல் தெய்வம். அம்மனுக்கு மிகவும் நம்பிக்கையானவளா இருந்ததினால சித்திரங்காதேவி ராஜ்ஜியம்தான் அந்தக் கோவில்ல. பேருக்கேத்த மாதிரியே சித்திரம் எழுதினாப்புல அழகு.

இளை: (சட்டென விறைப்பாகி) ஓ... காவல் தெய்வம்னா யட்சினி கிட்சினி மாதிரியோ?

நிமி: அந்த மாதிரிதான். காவல் தெய்வம்னா தேவதைகள். அம்மனோட பரிவார தேவதைகள். சில தேவதைகளுக்கு விசேஷ சக்திகள் கூட உண்டு. சித்திரங்கா ஆளை மயக்கும் மோகினி. அப்படிப்பட்ட ஒரு அழகு. ஆனா தேவதைகளுக்கு கட்டுபாடுகள் மிக அதிகம். நியமங்கள், விதிகள், வழிமுறைகள்னு ஏகபட்டது. சித்திரங்காவும் ரொம்பவே கட்டுபாடா இருந்து, அம்மனோட அபிமானம் பெற்று அந்தக் கோவிலோட அதிகார தேவதையா கோலோச்சிட்டு இருந்தா. ஆனா விதி யாரை விட்டது... (சிறு இடைவெளி விட்டு) குறுத்தாளாம்புத்தூர்ல வீரத்திருமன்னு ஒரு இளந்தாரி. நல்லா பதினெட்டு வயசுல பொலிகாளை மாதிரி ஊரை சுத்திட்டிருந்தவன். நல்லா லெட்சணமான பையன். எதற்கும் சலனப்படாத சித்திரங்காவையே சலனபடுத்தற அளவுக்கு ஆளு வாட்டசாட்டம்.

இளை: (ஆர்வம் அதிகமான பாவத்தோடு இருக்கையில் முன்னகர்ந்து கொள்கிறான்) ஓ! மேட்டர் அப்படிப் போவுதா? இண்டிரெஸ்டிங். இப்படில்லாம் கூட நடக்குமா என்ன?

நிமி: ஏன் நடக்காம? நிறய நிறய நடந்திருக்கு. எத்தன தேவதைகள் இப்படி சீரழிஞ்சு போயிருக்காங்க தெரியுமா? வீரத்திருமனை அடையறதுக்கு சித்திரங்கா மொதல்ல அவன் கனவுலதான் வந்து மயக்கினா. தேவதைகள் வழிமுறை அப்படித்தான். நம்ம ஆளு சொக்கிப் போயிட்டான். அப்படியே அவன செம்புரதி குளத்துக்கு வரவச்சு முழுசா மயக்கிட்டா. இரண்டு பேருக்கும் பரம சந்தோஷம். இந்தமாதிரி மனுச-தேவதை உறவுகள் வெளில தெரியாத வரைக்கும்தான் சந்தோஷம்லாம். வீரத்திருமனும் கெட்டிக்காரனாத்தான் இருந்தான். விசயம் வெளில தெரியாமலேயே சித்திரங்காவோட ஆட்டத்துக்கு ஈடு கொடுத்திட்டு வந்தான். தேவதைகளோட மனுசங்க பழகுறது சாதாரண விசயமில்லை. மனுசப் பயலுக முதல்ல மந்திரிச்சு விட்ட மாதிரி தேவதைகள் அழகில லயிச்சுப் போயிருப்பாங்க. ஆனா போகப்போக அந்த அழகு அலுத்துப் போயிரும். அதுவும் மனுசப்பயலுகளுக்கு... கோபம், தாபம், வேகம், விவேகம்னு இருக்கற உணர்ச்சிகளையெல்லாம் என்னா செய்யறது? தேவதைகள்கிட்ட நினச்சத பேசிற முடியாது. அவ சொல்றதுதான் விதி அங்கே. அந்த தேவதை விருப்பபடும் போதெல்லாம் சேவகம் செஞ்சிட்டிருக்கனும். பதினோரு வருசம் சித்திரங்காவோட சல்லாபிச்சிட்டிருந்தவனுக்கு நாளாவட்டத்துல சலிப்பு தட்டிப் போயிருச்சு.

இளை: (நாற்காலியின் நுனிக்கு நகர்ந்து) ஓ....

நிமி: தேவதை சகவாசம்கிறது ஒருவழிப் பாதைப் மாதிரி. மனுசப் பயலுக மீண்டு வரனும்னு நினச்சாலும் முடியாது. அந்த தேவதையா மனசு வச்சு நீங்கினாத்தான் அந்த ஒறவு முறியும். திருமனுக்கு கலியாணம் குழந்தை குட்டின்னு குடும்ப வாழ்க்கைக்கு ஆசப்பட ஆரம்பிச்சிருச்சு மனசு. சிரங்கு வந்த கையை குரங்கு சொறிஞ்ச மாதிரி ஆயிடுச்சு நம்மாளுக்கு. எப்படி சித்திரங்காகிட்டேர்ந்து விடுதல வாங்கறதுக்கு வழி தேட ஆரம்பிச்சான். அப்பத்தான் மந்திரவாதி கீர்த்திவாசன சந்திச்சான்.

இளை: (கைகளை பரபரவென தேய்த்துக் கொண்டு) மந்திரவாதின்னா? ஜகன்மோகினி படத்துல வர்ற மாதிரியா...

நிமி: ஹஹ (சிரிப்பு) அதெல்லாம் வெறும் கதைப்பா. நெஜ மந்திரவாதிகளை நேர்ல பாத்தா அடையாளமே தெரியாத சாதாரணமானவங்க மாதிரிதான் இருப்பாங்க. கீர்த்திவாசன் ஏகப்பட்ட மந்திர தந்திரங்கள்ல பயிற்சி பெற்றவன். இந்த மாதிரி சபலப்பட்டு கட்டுபாடுகள் விலகற தேவதைகள்னா மந்திரவாதிகளுக்கு அல்வா சாப்பிடற மாதிரி.

இளை: ஏன்?

நிமி: அந்த மாதிரி தேவதைகள்ல சிறைபடுத்தி கட்டுபாட்டுக்குள்ள கொண்டு வந்திட்டா பெரிய சக்தி கெடச்சிரும் கீர்த்திவாசனுக்கு. அதுக்கப்புறம் நிறைய சாதிக்கலாம். ஆனா அது ரொம்ப அபாயமானது. ஒரு மந்திரவாதி தன்னை கட்டுபடுத்த முயற்சி செய்யறான்னு சின்ன சந்தேகம் வந்தாக்கூட தேவதைகள் அவன உண்டு இல்லைன்னு ஆக்கிரும். அவங்களுக்கு தெரியாம அவங்களை கட்டுப்பாட்டுக்குள்ள கொண்டு வர்றது பெரிய சாகசம். இதோ அந்த தேவதையோட காதலனே வந்து உதவி கேக்கிறான். எம்புட்டுப் பெரிய சந்தர்ப்பம்? திருமன்கிட்ட சித்திரங்காவோட ஒரே ஒரு தலைமுடி மட்டும் கேட்டான் கீர்த்திவாசன். (கண்களை மூடிக் கொள்கிறார். சிறிது இடைவெளிவிட்டு மூடிய கண்களோடு) சங்கிருதய எந்திரம்னு ஒண்ணு இருக்கு. சிக்கலான கணக்குல எழுதப்படற இயந்திரம். அந்த எந்திரத்துல தேவதையோட முடியை ஒரு இரும்பு ஆணியில அப்பிரதட்சினமா சுத்தி ஈசான மூலையில அடிச்சிட்டா, முப்பத்தியிரெண்டாம் நாள் அந்த தேவதையை அப்படியே சிறைபடுத்திரலாம்.

இளை: வாவ்... தேவதைகள் எப்படி தலை சீவுவாங்க... தந்த சீப்பு ஏதாவது இருக்குமா?

நிமி: ஆனா சிக்கல் என்னன்னா, வீரத்திருமன் நெனச்சாக் கூட அந்த தேவதையோட முடியை கொண்டு வரமுடியாது. அவளா இஷ்டப்பட்டுக் கொடுத்தாத்தான் உண்டு.

இளை: ஓ... அப்படி வேற கஷ்டம் இருக்கா? கேட்டா கொடுக்க மாட்டாங்களா?

நிமி: ஹஹாஹா (பெரிதாக சிரிக்கிறார்) அவங்களுக்கு தெரியாதா அவங்க தலைமுடி, நகத்துண்டுல்லாம் எவ்வளவு முக்கியமானதுன்னு. அதுவும் மனுசப்பயகிட்ட நம்பிக்கை வச்சு அதையெல்லாம் அவ்வளவு சுலபமா கொடுத்திடுவாங்களா? கொஞ்சம் சந்தேகம் வந்தாக்கூட அம்புட்டுத்தான். மனுசன மொத்தமா செத்த மீனாட்டம் மொதக்க விட்டுருவாங்க குளத்துல.

இளை: (தலையைப் பிடித்துக் கொண்டு) ஐயோ.. சஸ்பென்ஸ் தாங்கல.... என்னதான் ஆச்சு சொல்லுங்க.

நிமி: கீர்த்திவாசன் அதுக்கும் ஒரு யோசனை பண்ணிபுட்டான். செம்புரதி குளக்கரையில சித்திரங்கா மாதிரியே வீரத்திருமன் கருங்கல்லுல ஒரு சிலை உருவாக்க வேண்டியது. ஏன்னு சித்திரங்கா கேள்வி கேட்டா ஊர் மக்களுக்கு சந்தேகம் வராம அவளை அடிக்கடி சந்திக்கிறதுக்காக அப்படி ஒரு ஏற்பாடுன்னு நம்ப வைக்க வேண்டியது. தேவதைகள்கிட்ட பொய் பேசி நம்ப வைக்கிறது ரொம்பவும் கஷ்டமான விஷயம்தான். ஆனா பல வருசங்களா வீரத்திருமனோட உறவா இருக்கறதுனால அவன்கிட்ட அவளுக்கு நம்பிக்கை அதிகம் வந்திருச்சு. மனுசப்பய கைபட்டதினால அவளுக்கு கொஞ்சம் சக்தி குறைபாடும் ஏற்பட்டிருந்தது.

இளை: ஓகோ.. சிலையை வச்சி தலைமுடியை எப்படி கொண்டு வர்றது?

நிமி: சொல்றேன். சொல்றேன். தேவதைகளுக்கு அவங்க அழகு மேல அதீத நம்பிக்கை உண்டு. அந்த நம்பிக்கையை காயப்படுத்தற மாதிரி அந்த சிலையில சின்ன குறைபாடு உண்டு பண்ணிடற வேண்டியது.

இளை: என்ன குறைபாடு?

நிமி: சிலையோடத் தலையில ஒரு வெள்ளைக் கோடு போட்டுரனும். அதாவது நரை முடி மாதிரி. நிச்சயம் சித்திரங்காவிற்கு அதத் தாங்க முடியாது. அத எப்படியாவது சரி செய்யனும்னு வீரத்திருமனை கட்டாயப்படுத்துவா. அதுவா உண்டாகிருச்சு... அதை இயற்கையா சரி செய்யனும்னா உன் இயற்கை முடியை கொடுன்னு கேட்டு வாங்கிற வேண்டியது.

இளை: கொக்கு தலையில வெண்ணெய் வச்சு...

நிமி: (கொஞ்சம் கோபமாக அவனப் பாத்து) உனக்கு தேவதை நியமங்கள் புரியாது. மனுசங்க உலகம் மாதிரிதான் அவங்க உலகமும். அதிசயம், முட்டாத்தனம் எல்லாம் அங்கேயும் உண்டு. சித்திரங்கா வீரத்திருமன் சொல்றத நம்பிட்டா.

இளை: நம்ம ஹீரோ சித்திரங்காவோட தலைமுடியை வாங்கிட்டானா?

நிமி: (சோகமாக) வாங்கிட்டானே!

இளை: (அவனும் சோகமாக) கீர்த்திவாசன்கிட்ட கொடுத்திட்டானா?

நிமி: (இன்னமும் சோகமாக) கொடுத்திட்டானே!

இளை: அடப்பாவி! (அழுகின்ற நிலையில்) இவ்வளவு அழகான தேவதையை போயும் போயும் ஒரு மந்திரவாதிகிட்ட பிடிச்சுக் கொடுத்திட்டானே.

நிமி: ப்ச்ச்ச்... ஆமாம்! கீர்த்திவாசன் அவளைக் கட்டுபடுத்த ஆசைப்பட்டானே தவிர சக்தி குறைஞ்ச அவள அதிகமா உபயோகபடுத்த முடியாதுன்னு தெரிஞ்சு போச்சு. அவள அப்படியே அந்த குளக்கரையில இருந்த சிலையிலேயே சிறைப் படுத்திட்டுப் போயிட்டான். அதிகார தேவதை இல்லாததினால அந்தக் கோவிலை விட்டு அம்மனும் போயிருச்சு. அந்த ஊர் மக்களும் பஞ்சம் வந்து பொழக்கிறதுக்கு அக்கம்பக்கம் ஊர்களுக்குப் போயிட்டாங்க. ராணி மாதிரி வலம் வந்த கோவிலும், ஊரும் பாழடஞ்சி போயி ஒரு குளக்கரை சிலையா மாறிட்டா சித்திரங்கா.

இளை: (மிகுந்த சோகமாக கண்களைத் துடைத்துக் கொண்டு) ஐயோ... பாவம். ஒரு மனுசன் மேல் காதல் வந்ததுக்கு இந்த தண்டனை ரொம்ப அதிகம்தான்.

நிமி: (அவனையே சில விநாடிகள் உற்றுப் பார்த்துவிட்டு) ரொம்ப பரிதாப்படாதே. சித்திரங்கா மனசில இப்பவும் வீரத்திருமன் மேல அடங்கா ஆசையும் கோவமும் இருக்கு. அவன ஜென்மம் ஜென்மமா தேடிட்டு வரா...

இளை: (முகத்தில் அதிர்ச்சி தோன்ற) ஜென்மம் ஜென்மமாவா?

நிமி: (அந்த உயர அடுக்கை காண்பித்து) இதோ இந்த நோட்டு புத்தகம் எல்லாம் வீரத்திருமனோட பல ஜென்ம கனவுகள்தான். கனவுல தோன்றி அப்படியே அவன மயக்கி செம்புரதி குளத்துக்கு கூப்பிடுவா. அந்த குளத்துல வச்சு அவனைக்...

இளை: (இருக்கை நுனிக்கு வந்து) அவனை?

நிமி: வேறென்ன... கொலைதான். அந்தக் குளத்துலயே மூழ்கடிச்சிருவா.

இளை: (கலவர முகத்துடன்) ஐயோ....அப்ப... அப்ப

நிமி: வீரத்திருமா... இது உன்னோட புதிய ஜென்மம். ஆனா சித்திரங்கா இன்னும் உன்னை மறக்கல.

இளை: (தலையில் கைகளை வைத்துக் கொண்டு கவிழ்ந்தவாறே) ஐயய்யோ... அப்ப நான் தப்பமுடியாதா...

நிமி: (சிறிது யோசனையாக) குளத்துக்கரை சிலையிலேயே உறைஞ்சிட்டதினால சித்திரங்கா சக்தி ரொம்பக் குறைஞ்சிப் போயிருச்சு.

இளை: (ஆர்வமாக மேஜையில் முன்னோக்கி வந்து) நான் தப்பிக்கனும்னா என்ன செய்யனும்... என்னதான் செய்யனும்?

நிமி: (அவர் முன்னால் இருந்த நோட்டுப் புத்தகத்தை எடுத்து பேனாவால் ஏதோ எழுதுகிறார்) இதுவரை அவள் குரல் உனக்குக் கேக்கல. அதனால அவளால உன்னை மயக்க முடியல. சித்திரா பௌர்ணமி வந்தா அவ சக்தி உச்சத்தை அடையும். அப்ப அவ குரல் உனக்கு நிச்சயம் கேக்கும். அவ கேக்கற கேள்வி உனக்கு அர்த்தமாகும்.

இளை: என்ன கேள்வி அது? என்ன கேள்வி அது?

நிமி: (நோட்டையேப் பார்க்கிறார். பிறகு கண்களை முழுவதுமாக மூடிக்கொள்கிறார்) அந்தக் கேள்வி தெரியுது எனக்கு. (கண்களை நன்றாக திறந்துகொண்டு, சோகமான பாவனையோடு) ஆனா அதை உங்கிட்ட நான் சொல்ல முடியாது. சொல்லவும் கூடாது. இதோ உன்னோட நோட்டுல எழுதிட்டேன். (மூடிய நோட்டை தூக்கிக் காட்டுகிறார்) அந்தக் கேள்விக்கு ஒரே பதில்தான் நீ சொல்றபடி இருக்கும். அதச் சொன்னதோட உன்னோட இந்த உலக வாழ்க்கை முடிஞ்சிரும்.

இளை: (பதற்றமாக எழுந்து கொண்டு) வேற வழியே இல்லையா... நான் இந்த உலகத்துல வாழவே முடியாதா?
எழுதி முடித்த பாவனையில் பேனாவை மேஜையில் வைத்து விட்டு நோட்டு புத்தகத்தை அந்த உயர அடுக்கில் சேர்க்கிறார். இளைஞன் தாவி அந்த நோட்டு புத்தகத்தை எடுக்க பாய்கிறான். அப்படியே இருள் கவிழ்ந்து காட்சி முடிகிறது.

காட்சி - 3
இருட்டுப் பின்னணியில் சுருள் சுருளாகப் வெண்மையானப் புகை பரவுகிறது. மெலிதாக வெளிச்சம் திரையில் விரவி அந்தப் பெண்ணின் முகம் தெரிகிறது. அழகாக தலையசைத்தவாறே ஏதோ பேசுவது தெரிகிறது. ஆனால் சத்தம் கேட்பதில்லை. ஓர் அதிர்வுடன் திரையில் அலைஅலையாக பரவி காட்சி கலங்கலாக தெரிந்து சட்டென்று உயிர்பெற்று அவள் முகம் தெளிவாக தெரிகிறது. பின்னணி இசை நின்றுவிட, இப்பொழுது அந்தப் பெண்ணின் குரல் தெளிவாக ஒலிக்கிறது.

‘என்ன? என்ன ஆச்சு? ஏன் இப்படி வேர்த்து கொட்டுது? மறுபடியும் அதேக் கெட்ட கனாவா?’ தலையை ஆட்டிக் கொண்டே கேட்கிறாள்.

Image courtesy: Virginia Frances Sterret

பின்னறிவிப்பு:

நண்பர்கள் இந்தக் கதையை குறும்படமாக உருவாக்கி யூட்யூபில் வெளியிட்டிருக்கின்றனர்.

2009ம் வருடம் பதிவர் சர்வேசன் நடத்திய ‘நச்’ சிறுகதை போட்டியில் பரிசு பெற்றது.

39 comments:

ரா.கிரிதரன் said...

முன்னமே சொல்லியபடி - லிங்க் தப்பாக இருக்கிறது. போட்டியின் லிங்கும் வேறு.

விவரணைகள் அதிகமா இருக்கு. காட்சிரூபமா இல்லையே. குறும்படத்திற்குத் தேவையான மேடை/முக உணர்ச்சி/சுற்றுச்சூழலை அதிகப்படுத்துங்கள் - நன்றாக இருக்கும்.

-ரா.கிரிதரன்

Sridhar Narayanan said...

வாங்க கிரி! சுடச்சுட கமெண்ட் போட்டிருக்கீங்க. உங்கள் வருகைக்கும் கருத்துக்கும் மிக்க நன்றி.

லிங்க்குகளை சரி செய்துவிட்டேன்.

காட்சி குறிப்பையும், காட்சியையும் இணைத்து கொடுப்பதால் விவரணைகள் அதிகமாக தெரிகிறது போல். யோசித்து சரி செய்ய முயற்சிக்கிறேன்.

இலவசக்கொத்தனார் said...

எதோ கனவு மாதிரி இருக்கு!!

Sridhar Narayanan said...

வாங்க இலவசம்!

கனவுதான். ஆனா எது கனவுன்னு லைட்டா டவுட்டு :) நீங்க கூட கமெண்ட் போட்டா மாதிரி ஒரு கனவு வந்திச்சே எனக்கு :))

சென்ஷி said...

அருமை...........!

pappu said...

எது கனவுங்கறதுல தான் ட்விஸ்ட்டா? நல்லா எழுதுறீங்க. மேஜிகல் ரியலிஸம் எல்லாம் எப்படித்தான் எழுதுறீங்களோ?

Sridhar Narayanan said...

வாங்க சென்ஷி...

உங்க வருகைக்கும் பாராட்டுக்கும் மிக்க நன்றி.

வாங்க பப்பு...

மாய யதார்த்தமா? படிக்கிறவங்களை பயமுறுத்தி ஓட வைக்கப் பாக்க்கிறீங்களா? ஏன் இந்த கொலை வெறி? :)

உங்க வருகைக்கும் பாராட்டுக்கும் மிக்க நன்றி.

யோசிப்பவர் said...

//கனவுகளில் ஒருவர் படிகளில் ஏறிப் போற மாதிரி பாத்தா அது எதிர்பார்ப்புகளைக் குறிக்குது. ஓடிக்கிட்டு இருக்கற மாதிரி கனவு வந்தா சுதந்திரம்னு அர்த்தம். வானத்தைப் பாத்தா அளவில்லா சுதந்திரம்...
//
ஹலோ மிஸ்டர் நிமித்தக்காரன்,
எனக்கு பறக்கிற மாதிரி கனவு அடிக்கடி வருது. அதுக்கு என்ன அர்த்தம்? கொஞ்சம் அந்த நோட்டு புத்தகத்த பார்த்து சொல்லுங்களேன்.!!

ஸ்ரீதர்,
கதை (மிக) நன்றாக இருக்கிறது!!! ஆனாலும் கதை வடிவம்தான் கொஞ்சம் ப்ரேக் போடுறா மாதிரி இருக்கு. இது என்னோட தனிப்பட்ட கருத்து!!

அனுஜன்யா said...

யோவ், இந்த மாதிரி கதை எழுதிட்டு, என் கவிதை ஒண்ணும் புரியலன்னு புகார் வேற.

நல்லா வந்திருக்கு ஸ்ரீதர். ஆல் தி பெஸ்ட். கனவுகள் பற்றிய விவரணைகள் .... அட்டகாசம்.

அனுஜன்யா

ambi said...

நல்லா இருக்கு. கடைசில அவனின் தங்கமணி தான் சித்ராங்கின்னு சூசகமா ஏதேனும் சொல்லி இருக்கலாம். :))

கே.எஸ்.ரவிகுமார் படம் மாதிரி பஞ்சாயத்து நீங்கலாக ஆக்ஷன், சென்டிமென்ட், ஜல்சானு கலந்து கட்டி குடுத்து இருக்கீங்க. :))

நிறைய படங்கள் கிளிஷேக்களா மனதில் வருவதை தவிர்க்க முடியலை. :p

ambi said...

அட கொத்தனாருக்கு பின்னூட்டம் எல்லாம் போட தெரியுமா? :p

பெயர் சொல்ல விருப்பமில்லை said...

சூப்பர். கலக்கிட்டீங்க. முடிவை நான் எதிர்பார்க்கவில்லை. வாழ்த்துகள்!

Sridhar Narayanan said...

வாங்க யோசிப்பவர்ஜி!

//எனக்கு பறக்கிற மாதிரி கனவு அடிக்கடி வருது//

இப்படி மொட்டையா சொன்னா என்ன அர்த்தம்? எந்த ஃபிகர் கூட பறக்கிற மாதிரி கனவு வருதுன்னு கரீக்ட்டா சொல்லுங்க.

உங்க கருத்துக்கும் பாராட்டுக்கும் மிக்க நன்றி. உங்கள் கதையும் படித்தேன். made in Mars series போடலாமே நீங்க :) நன்றாக இருந்தது. ஸ்ரீதேவி கதை அழகு. உங்கள் இருவருக்கும் வாழ்த்துகள்.

வாங்க அனுஜன்யா!

//என் கவிதை ஒண்ணும் புரியலன்னு//

உங்க கவிதையா? எங்க? எங்க? :))))

நீங்கதான் இப்ப பத்தி எழுத்துக்கு மாறிட்டீங்களே. கலக்குங்க :)

உங்க வருகைக்கும் பாராட்டுக்கும் மிக்க நன்றி.

அம்பி சார்!

//கே.எஸ்.ரவிகுமார் படம் மாதிரி பஞ்சாயத்து நீங்கலாக ஆக்ஷன், சென்டிமென்ட், ஜல்சானு கலந்து கட்டி குடுத்து இருக்கீங்க. :))//

டோட்டல் டேமேஜ் பண்ணிட்டீங்க. நன்னி :)

கொத்தனார் கனவில ரூட் மாறி வந்திட்டார்ப்போல :)

மிக்க நன்றி!

வாங்க அனானி!
//சூப்பர். கலக்கிட்டீங்க. முடிவை நான் எதிர்பார்க்கவில்லை. வாழ்த்துகள்!//

வருகைக்கும் கருத்துக்கும் மிக்க நன்றி.

தமிழ்ப்பறவை said...

//கடைசில அவனின் தங்கமணி தான் சித்ராங்கின்னு//
இதுதான் முடிவா..? இதைத்தான் நான் புரிஞ்சிக்கிட்டேன்...
நல்லா இருந்தது...
பாதிக்கதைக்கப்புறம் நிமித்தகாரன் சொல்லச் சொல்ல, ஆர்வத்தோடு கேட்கும் அந்த இளைஞனாகிக் கதை கேட்டேன்.
//ஆல் தி பெஸ்ட். கனவுகள் பற்றிய விவரணைகள் .... அட்டகாசம். //
ரிப்பீட்டேய்...

Sridhar Narayanan said...

வாங்க தமிழ்ப்பறவை!

//இதுதான் முடிவா..? இதைத்தான் நான் புரிஞ்சிக்கிட்டேன்...//

இருக்கலாம். அவனோட கனவுதானே... நாம எப்படி வேணா பாக்கலாம். :)

உங்க வருகைக்கும் பாராட்டுக்கும் மிக்க நன்றி.

Vijay said...

ராத்திரி ஒன்னரை மணிக்கு இந்த மாதிரி கதைய படிச்சா என் கவவிலும் இந்த மாதிரி தேவதை வரும்னு எனக்கொரு நம்பிக்கை. வந்தா சொல்றேன்.
ஆனா எனக்கென்னவோ நாளை காலை உங்க க்ளைமாக்ஸ் மாதிரி கொஞ்சம் இருக்கும்னு தோணுது. தங்கமணி "இன்னும் என்ன உனக்கு தூக்கம் வேண்டி கெடக்குன்னு" திட்டுவா.
சூப்பர் கதை ஸ்ரீதர்.

சுவாசிகா said...

பின்னீட்டிங்க போங்க..இப்படிதான் இப்படி விலாவரியா எழுதினீங்களோ

வெற்றி நிச்சயம்னு தெரியுது..ஜமாய்ங்க

அன்புடன்,
சுவாசிகா
ஐ லவ் யூ - சர்வேசன் – நச்னு ஒரு கதை 2009 – போட்டிக்காக எழுதிய கதை

Sridhar Narayanan said...

வாங்க சுக்கானான் (scanman) சார்!

//தங்கமணி "இன்னும் என்ன உனக்கு தூக்கம் வேண்டி கெடக்குன்னு" திட்டுவா//

அங்கேயுமா? இந்த ஆம்பள பொழப்பே இப்படித்தாங்க டாக்டர் :)

உங்க வருகைக்கும் பாராட்டுக்கும் மிக்க நன்றி.


வாங்க சுவாமிண்ணே!

உங்க வருகைக்கும் பாராட்டுக்கும் மிக்க நன்றி :)

சின்ன அம்மிணி said...

கனவு எது நிஜம் எதுன்னு கடைசில்ல புரியவைச்சிருக்கீங்க. அருமையா இருக்கு. டாப் -2 ல வர வாழ்த்துக்கள்.

Sridhar Narayanan said...

வாங்க சின்ன அம்மிணி!

உங்க வருகைக்கும் பாராட்டுக்கும் மிக்க நன்றி.

//கனவு எது நிஜம் எதுன்னு கடைசில்ல புரியவைச்சிருக்கீங்க//

:))

மதுரையம்பதி said...

பரிசை வெல்ல வாழ்த்துக்கள் ஸ்ரீதர்.

SurveySan said...

கெலிச்சுட்டீங்க.
வாழ்த்துக்கள்.

ஈ.மடலில் தொடர்பு கொள்ளவும், விவரங்கள் இங்கே:
http://surveysan.blogspot.com/2009/12/2009.html

ராமலக்ஷ்மி said...

பரிசு வென்றமைக்கு நல்வாழ்த்துக்கள்!

PPattian : புபட்டியன் said...

கதை நல்லா இருக்கு.. முதல் பரிசுக்கு வாழ்த்துகள்

Sridhar Narayanan said...

மௌலி சார் - வாழ்த்துகளுக்கு மிக்க நன்றி சார் :)

Sridhar Narayanan said...

சர்வேசன்... அதிக நேரம் செலவழித்து திறம்பட போட்டி நடத்தியதற்கும் மிகவும் நன்றி.

மிகவும் ஊக்கம் தரக்கூடியது உங்கள் முயற்சி. தொடர்ந்து இது போல் செய்ய வாழ்த்துகள்.

Sridhar Narayanan said...

வாங்க ராமலஷ்மி... உங்கள் வருகைக்கும் வாழ்த்துகளுக்கும் மிக்க நன்றி.

Sridhar Narayanan said...

புபட்டியன் - வாழ்த்துகளுக்கு மிக்க நன்றி :)

தமிழ்ப்பறவை said...

வெற்றி பெற்றமைக்கு வாழ்த்துக்கள் ஸ்ரீதர்...

Shakthiprabha said...

முதலில் வாழ்த்தைப் பிடியுங்கள். :) congratulations!!!

நான் உங்கள் கதையை படிக்கவில்லை. படித்துவிட்டும் மறுபடி பின்னூட்டம் இடுகிறேன் :)

பிரியமுடன்...வசந்த் said...

கனவுதேசம் போன ஃபீலிங்...

வெற்றி பெற்றமைக்கு மனமார்ந்த வாழ்த்துக்கள்...

நிலாரசிகன் said...

வாழ்த்துகள் தோழர் :)

" உழவன் " " Uzhavan " said...

வெற்றிக் கதைக்கு வாழ்த்துக்கள்!
மிகவும் நேர்த்தியான எழுத்து. காட்சியமைப்பும் அருமை. நிச்சயம் படமாக எடுக்கலாம்.
 
அன்புடன்
உழவன்

ஸ்வர்ணரேக்கா said...

வெற்றிக்கு வாழ்த்துக்கள்....

Sridhar Narayanan said...

தமிழ்ப்பறவை - உங்கள் வருகைக்கும் பாராட்டுக்கும் மிக்க நன்றி.

வாங்க சக்திபிரபா,

வாழ்த்துகளுக்கு மிக்க நன்றி.

//படித்துவிட்டும் மறுபடி பின்னூட்டம் இடுகிறேன்//

ரொம்ப நேரமா படிக்கறீங்கப் போல :) நீங்கள் இடப் போகும் அடுத்த பின்னூட்டத்துக்கும் அட்வான்ஸ் நன்றி.

வாங்க ப்ரியமுடன் வசந்த்! உங்க வருகைக்கும் பாராட்டுக்கும் மிக்க நன்றி.

வாங்க நிலா ரசிகன்!

உங்க வருகைக்கும் பாராட்டுக்கும் நன்றி.

வாங்க உழவன்!

//நிச்சயம் படமாக எடுக்கலாம்//

என்று நினைத்துதான் எழுதியது. இன்னமும் நேரம் அமையவில்லை :)

வாழ்த்துகளுக்கும், பாராட்டுகளுக்கும் மிக்க நன்றி.

வாங்க ஸ்வர்ணரேக்கா

வாழ்த்துகளுக்கு மிக்க நன்றி.

பின்னோக்கி said...

போட்டியில் வெற்றி பெற்றதற்கு வாழ்த்துக்கள். நல்ல திரைக்கதையுடன் கூடிய கதை.

SurveySan said...

can you suggest me a short story for a 15 min short film?

check this out. want to make a next one :)
http://surveysan.blogspot.com/2011/11/blog-post.html

Prabhu Rajadurai said...

கனவுக்கு அர்த்தம் கண்டுபுடிக்கிற மாதிரி இந்த மாதிரி கற்பனை பண்றதுக்கும் அர்த்தம் கண்டுபுடிச்சா...

ஸ்ரீதர் நாராயணன் said...

வக்கீல் சார் :-))

இப்படில்லாம் கற்பனை செய்யறதுக்கு புதுசா என்ன அர்த்தம் இருக்கப் போகுது.... கோட்டித்தனம்தான். :-))