பாட்லக்

நான்கு மாதங்களுக்கு முன்னர் வாடகைக்கு வீடு தேடும்போது பவுலா என்ற லீசிங் மானேஜர் தற்போது தங்கியிருக்கும் வீடை சுற்றிக் காண்பித்தார். நாசூக்காக கேட்பதாக நினைத்துக் கொண்டு ‘இந்தியர்கள் அதிகம் இருக்கிறார்களா இந்தப் பக்கம்?’ என்று கேட்டேன். சிஐஏ ஏஜெண்டிடம் கிளாசிஃபைட் தகவலைக் கேட்டது போல் துணுக்குற்றவராக, ‘அதெல்லாம் சொல்ல எனக்கு அதிகாரம் இல்லை. சொல்லவும் கூடாது’ என்று சொல்லிவிட்டார். போதாதற்கு பதிவர் சீமாச்சு அவர்கள் இந்த ஊரில் முன்பே தங்கியிருந்த விவரம் பொது நண்பர் ஒருவர் மூலமாக தெரிந்து கொண்டு அவருக்கும் தொ(ல்)லை பேசி இங்கு இந்தியர்கள் ஜனத்தொகை பற்றி புள்ளிவிவரம் எல்லாம் கேட்டு தொந்தரவு செய்து கொண்டிருந்தேன். புதிய இடம், புதிய Neighbourhood என்ற தயக்கங்கள் அதிகமாக இருந்தது.

தெருவோடு நடந்து போகும்போது தெரியும் இந்திய முகங்கள், வீட்டுக் கதவுகளை கடந்து போகும்போது கேட்கும் தமிழ்க் குரல்கள் என்று புதிய தொடர்புகள் ஏற்படுத்திக் கொள்ள ஆர்வமாக இருந்தோம். இரண்டாவது கட்டிடத்தில் ஒரு தமிழ் நண்பரின் அறிமுகம், மூன்று மைலில் இருக்கும் கோவிலில் ஒரு தமிழ் நண்பரின் ஃபோன் நம்பர் என்று ஒன்றிரெண்டு தொடர்புகளைத்தான் தேற்றிக் கொள்ள முடிந்தது. இணையத்தைத் தாண்டி என்னுடைய நெட்வொர்க்கிங் திறமை கிட்டத்தட்ட பூஜ்யம்தான் இதுவரை.

கடந்த வாரம் திடீரென்று வீட்டில் ஏதோ ஜீனி (Genie) வந்துவிட்டுப் போனது போல பளிச் சமையலறையும், முறிச் பாத்ரூமும் பார்த்து பரவசமாகி மனைவியிடம் ‘என்னம்மா மேட்டர்? வீட்டில் ஏதும் உள்-வாடகைக்கு விட ப்ளான் போட்டுக் கொண்டிருக்கிறாயா?’ என்று கேட்டபோதுதான் தெரிந்தது வீட்டில் பாட்லக் பார்ட்டிக்கு ஏற்பாடு செய்து கொண்டிருந்தார் என்று. இந்த பாட்லக்கில் ஒரு சௌகரியம் என்னவென்றால் நமக்கு பிடித்ததோ பிடிக்காததோ ஏதாவது ஒரு பதார்த்தத்தை மட்டும் நிறைய செய்துகொண்டு பார்டிக்குப் போனால் அங்கே பல பதார்த்தங்களை ருசிப் பார்க்கலாம். பார்டிக்கு வருகிற ஒவ்வொருவரும் ஏதாவது ஒரு ஐட்டம் செய்து கொண்டு வருவார்கள். பலவகை சமையலை ஒரே இடத்தில் ஒரு வெட்டு வெட்டலாம். அட! ஆயிரக்கணக்கானோர் புழங்கும் இடத்தில் தினமும் பொட்டி தட்டறதா பாவ்லா செய்யும் நமக்கே இதுவரை ஐந்து இந்தியர்களைத்தான் பழக்கம் ஆயிருக்கிறது. அதிலும் மூன்று மலையாளிகள், இரண்டு தெலுங்கர்கள். மாதரசிகளின் மாநாட்டிற்கு என்ன பெரிய வரவேற்பு இருக்கப் போகிறது என்று சற்றுப் பொறாமையோடு ‘எவ்ளோ பேரு வரப்போறாங்க’ என்று கேட்டால் பத்து பேராவது வருவார்கள் என்று எரிச்சலில் எண்ணெய் வார்த்தார்.

மகளிர் மட்டும் கலந்து கொள்ளும் பார்ட்டி என்பதால் காலையிலேயே நமக்கு கல்தா கொடுத்து வேலைக்கு துரத்திவிட்டார்கள். கிட்டத்தட்ட பதினாறு இல்லத்தரசிகள் குழந்தைகளோடு ஒன்று கூடி, வாகாக அன்று ஒரு தோழிக்கு பிறந்த நாள் வேறு அமைந்ததால் கும்மாளமாக கேக் வெட்டி கொண்டாடி மகிழ்ந்தார்கள். அன்றைக்கு என்று பார்த்து வீட்டில் ஏதோ ரிப்பேர் வேலை செய்ய வந்திருந்த பெயிண்டருக்கு பாவம் ரஷ்யன் மட்டும்தான் தெரியுமாம். இந்தியப் பெண்களின் கூட்டு கூக்குரலை கண்டு பயந்து அவர் தனது வேலையை அடுத்த அபார்ட்மெண்ட் வளாகத்திற்கு மாற்றிக் கொண்டு விட்டார் என்று கேள்வி.

சும்மா சொல்லக் கூடாது. சூப்பர் கலவையாக ஸ்ப்ரிங் ரோல், வெஜிடபிள் புலவ், சாம்பார் இட்லி, ராஜ்மா தால், உளுந்து வடை என்று நல்ல வெயிட்டான் மெனு. இந்தியப் பெண்களிடையே ஒரு சீனரும் தனது பையனோடு இந்திய ஸ்பைசி உணவை ருசி பார்க்க கலந்து கொண்டார். இம்முறை பாட்லக்கில் சைவ உணவு வகைகள் மட்டும் என்று முடிவு செய்துவிட்டதால், பாவம் அவருக்கு ஸ்கோப் கொஞ்சம் கம்மியாக இருந்தாலும் நன்கு அனுபவித்தார். புதிய ருசிகளோடு, புதிய நட்புகளையும் உருவாக்கிக் கொடுக்கும் இந்த பாட்-லக் பார்டிகள் ஒரு அருமையான வழி என்பது உண்மை. பகுத்துண்டு பல்லுயிர் ஓம்பும் தமிழ் சமூகம், உலகத்திற்கு அளித்த கொடையாக இந்த பாட்லக் இருக்கும் என்பது என் கணிப்பு :)

நடந்து முடிந்த பார்டியில் நிறைவேறிய ஒரு முக்கிய தீர்மாணமாக அடுத்த முறை அரங்கேறும் பாட்லக்கிற்கு (இம்முறை வேறு ஒருவர் வீடாக இருக்கும்) ஆண்களுக்கும் இட ஒதுக்கீடு கொடுக்க யோசித்து வருகிறார்களாம். பின்னே பார்டி முடிந்தபிறகு குப்பைகளை கொண்டு வெளியில் கொட்ட, சோஃபாவை, கார்பெட்டை துப்புரவு செய்ய ஆட்கள் வேண்டியிருக்கறதாமே?