முப்பத்தி ஏழு பேரை விசாரணை செய்துவிட்டு, இறந்து போன ஓடெல் மற்றும் கோமாவிலிருக்கும் பிராஸிடமிருந்து கைப்பற்றிய துப்பாக்கிகளையும், நிலவறையிலிருந்து சேகரித்த குப்பை கூடை முதல் மெழுகுவர்த்தி ஸ்டாண்டுகள்வரை மூட்டைக் கட்டிக் கொண்டு ஆஃபீஸ் வந்து சேர்ந்தேன். ரிக்கி மதிய சாப்பாட்டிற்கு வெளியில் சென்று விட்டிருந்தான். சர்ச்சை சீல் வைத்து மூடிவிட்டு மரியோ ஏதோ பள்ளி நிகழ்ச்சிக்கு பாதுகாப்பை மேற்பார்வையிட சென்றுவிட்டார்.
சீன் ஆஃப் த கிரைம் இதுதான் என்று ஒரு சித்திரம் உருவாகிவிட்டது இப்பொழுது. பிராஸ் துப்பாக்கியோடு ஓடெல்லை சுட வந்திருக்க வேண்டும். அவர் சுட்டது ஓடெல் தலையைத் தாக்கியிருக்கிறது. ஓடெல் பதிலுக்கு சுட்டுவிட்டு பிறகு இரத்த இழப்பினாலும் மூளை செயலிழந்ததினாலும் இறந்துவிட்டார். பாஸிபிள். பதிலுக்கு ஓடெல்லும் சுட்டிருக்கிறார். காயமடைந்த பிராஸ் நினைவிழந்துவிட்டார். ஆஸ்பத்திரியிலிருந்து செய்தி ஏதும் இல்லை இதுவரை.
மோடிவ்? விசாரணையில் நண்பர்களிடையே பல வருடங்களாக பகை புகைந்து கொண்டிருந்தது தெரிகிறது. பகைக்கான காரணம் தீர்க்கமாக தெரியவில்லை. பிராஸின் மனைவி மேகனுடன் இளம்வயதில் ஓடெல் நட்பாக இருதிருக்கிறார். இன்றுவரை ஓடெல் திருமணம் செய்து கொள்ளாததற்கு அதுவும் ஒரு காரணமோ? பிராஸ் ஓடெலின் சிநேகிதியை கவர்ந்து கொண்டாரா? கேள்விகளுக்கு விடைதெரியவில்லை.
ஃபாரம் ஃபாரம்களாக நிரப்பி, கொணர்ந்து வந்த பொருட்களை எல்லாம் பட்டியலிட ஆரம்பித்தேன். துப்பு துலக்குவதில் இருக்கும் பெரும் தலைவலி இந்த தகவலகளை ஒழுங்கு படுத்துவதுதான். மாலைக்குள் இவைகளை சில்வியாவிடம் ஒப்படைத்துவிட்டு கிரைம் ரிப்போர்ட் தயார் செய்ய வேண்டும். லென்னியோடு சந்திக்கும் போது குற்றம் நிகழ்ந்த விவரம் முழுவதும் தெளிவானால் நல்லது.
ஓடெல் கையில் இருந்த துப்பாக்கி .38 ஸ்மித் & வெஸ்ஸன். பழைய சரக்கு. இதை வைத்து மான் வேட்டைக்கு போயிருக்கிறாரா என்ன. பிராஸிடமிருந்தது 6.5m ரைஃபிள். இத்தாலியத் தயாரிப்பாக இருக்க வேண்டும். எவிடென்ஸ் துறைக்கு குறிப்பு எழுதிக் கொண்டு இருக்கும்போதுதான் ’திடுமெ’ன அது உறைத்தது. கொண்டுவந்த குப்பைகளையும், சாதனங்களையும், ஏனைய பொருட்களையும், ஆதாரங்களையும் முழுவதுமாக மீண்டும் சோதித்துப் பார்த்ததில் உறுதியானது. சர்ச் நிலவறையிலிருந்து ஒரு கார்ட்ரிட்ஜ்தான் கண்டெடுக்கப் பட்டிருக்கிறது. இருவரும் மாறி மாறி சுட்டிருந்தால் இரண்டு குண்டுகள் வெளியேறியிருந்திருக்க வேண்டும். இரண்டு கார்ட்ரிட்ஜ்கள் கிடைத்திருக்க வேண்டும்.
கையில் உறை மாட்டிக்கொண்டு ஏற்கெனவே பதிந்திருக்கும் கைரேகைத் தடங்கள் அழியாதவாறு ஓடெல்லின் துப்பாக்கியை சோதித்து பார்த்ததில் ஒரு குண்டு வெளியேறியிருக்கிறது என்பது உறுதியானது. பிராஸ்ஸின் ரைஃபிளில் அன்-காக் செய்து பார்த்தால் குண்டு அறையில் ஒரு குண்டு முழுவதுமாக இருந்தது. அது ஒரு குண்டு மட்டும் லோட் செய்யக் கூடிய ரைஃபிள். ஓடெல்லை சுட்டுவிட்டு இன்னொரு குண்டை அதில் மீண்டும் லோட் செய்திருப்பாரா? அதற்குபிறகா ஓடெல் இவரை திருப்பிச் சுட்டிருப்பார்? ஓடெல் முதலில் சுட்டிருந்தால்...
ஒன்று தெளிவாக புரிந்தது. பிராஸ் துப்பாக்கியை உபயோகித்திருக்க அதிக சாத்தியம் இல்லை. அப்படியென்றால் ஓடெல்லை சுட்டது யார்? மூன்றாவது ஆள் யாரேனும்?
ரிக்கி வந்துவிட்டான். ’இந்தா சீஃப்... ஓடெல் பற்றிய டாஸ்ஸியர் (dossier). பிராஸ் மற்றும் மேகன் பற்றியும் தயார் செய்துவிட்டேன். ஏதாவது தவறு இருந்தால்...’ நெஞ்சைத் தட்டிக் காண்பித்து ‘என்னைக் கேள்’ என்றான். அவனுடைய திறமை மேல் அபார நம்பிக்கை. ரிக்கி இருக்கட்டும். இப்பொழுது உடனடியாக தெரியவேண்டியது பிராஸ்ஸின் நிலமை. யார் ஓடெல்லை சுட்டார்கள் என்பது அவரால் மட்டும்தான் சரியாகச் சொல்ல முடியும்.
ஃபோனில் வந்த டாக்டரின் படபட பேச்சு சுத்தமாக புரியவில்லை. பெயர் மட்டும் ‘நிஜு ஜார்ஜ்’ என்று ஏதோ பாதி புரிந்தது. ‘கொஞ்சம் நிதானமாக சொல்லு’ என்றேன். ஈஸ்டன் ஆஸ்பத்திரியில் நிறைய அயல்நாட்டவர்கள் வேலை செய்கிறார்கள்.
பிராஸ்ஸின் மணிக்கட்டை துளைத்துக் கொண்டு நெஞ்சில் பாய்ந்து இருக்கிறது குண்டு. இதயத்திற்கு சேதமில்லை. உடலுறுப்புகள் வேலை செய்கின்றன. பாஸிபிள் கோமா. கிழிந்தது.நான் உருவாக்கி வைத்திருந்த குற்றக் காட்சி முற்றிலும் தவறு போலத் தெரிகிறது. நாளை பிராஸ்ஸின் மனைவியை சந்தித்து விரிவாக பேச வேண்டும் என்று குறித்துக் கொண்டேன். இரவு லென்னியை சந்தித்தபோது மூன்றாம் நபர் இருந்திருக்கலாம் என்ற ஹேஷ்யத்தை வெளியிடவில்லை.
இரவு விதவிதமான கனவுகள். எல்லாவற்றிலும் ஓடெல் துப்பாக்கியோடு தன்னை தற்காத்துக் கொள்ள ஓடுவது போலவும் முடிவில் திரும்பி சுடுவது போலவும் காட்சிகள். மறுநாள் எக்ஸ்பிரஸ் டைம்ஸில் பெரிய செய்தியாக ஓடெல் கொலை வெளியாகிருந்தது. பிராஸ் ரெய்ல் பற்றி நிறைய துக்கடா செய்திகள் போட்டிருந்தார்கள். அவர் நடத்தும் ரெஸ்டாரெண்ட் பற்றி ஒரு பெட்டி செய்தி இருந்தது. இவரா கொலை செய்தார்? துப்பு துலக்குகிறவர்களுக்கு உள்ளுணர்வு வேலை செய்யும் என்பார்களே? எங்கே எனது உள்ளுணர்வு?
1 மறுமொழிகள்:
அட்டகாசம் தல ;))
Post a Comment