ஆயிரம் குழப்பங்களில் ஒருவன்

’சோழர்குலத்தை பூண்டோடு அழிக்க சபதம் பூண்ட பாண்டிய ஆபத்துதவிகள் போன்ற ஒரு இரகசியக் குழு (secret brotherhood), ஆயிரம் வருசங்கழிச்சு இந்த 2010ம் ஆண்டிலும் துப்பாக்கி கிரனேட் எல்லாம் வச்சுகிட்டு சோழர்களை துரத்திட்டேப் போறாங்க... ஆதித்தன் கரிகாலன் மரணம் படிச்சிருப்பீங்களே... அந்த மாதிரி ஒரு ப்ளாட்’

’சூப்பர்! ஆனா இது பீரியட் ஃபிலிம் மாதிரியாவா இல்ல மாடர்னாவா?'

'பல நூற்றாண்டுகளா ‘பொத்தி வைக்கைப்பட்ட’ ஒரு சோழர் நாகரீகம் இன்னமும் இருக்கு. ஒரு தீவு இருக்கு. அதுல சோழ நாட்டுக்காரங்கதான் இன்னிக்கும் இருக்காங்க. மாடர்னும் பீரியடும் கலந்து கொடுக்கிறோம்.'

'ஹ்ம்ம்... ரொம்ப டிஃபெரெண்டா இருக்கே...'

'இருங்க. இருங்க. ஒரு parallel line போட்டுக்கலாம். அந்த சோழர்களைப் பத்தி இந்திய தொல்பொருள் துறையினர் ஆராய்ச்சி செய்யறாங்க. இராணுவம், professionals குழு, எடுபிடி, ஆதிவாசிகள் எல்லாம் கலந்து ஒரு பெரிய குரூப்பா சோழர்களை அழிக்கப் போறாங்க. சுவாரசியமா, mysticalஆ பண்ணலாம்.'

'ஓ...ஓ... இப்படி ஒரு ட்ரீட்மெண்டா? ஆர்க்கியாலஜி ரிசர்ச், பழிவாங்கறது, இன மோதல்னு மூணு லைன்ல சொல்லப் போறிங்களா? கொஞ்சம் ஹெவிதான்.'

'லைட்டாக்கறதுக்கு கொஞ்சம் ஜனரஞ்சகமா பொம்பள பொறுக்கி ஹீரோ, குத்துப் பாட்டு, ஹைடெக் கெட்ட வார்த்தைன்னு, ரீமிக்ஸுன்னு பண்ணிக்கலாம்.'

'ஓ!'

'கடைசி சோழ இளவலை தலைமறைவா கொண்டுட்டுப் போற மந்திரி ஏழு அடுக்கு அரண் வைக்கிறார். கடல், பாலைவனம், ஹலுசினேஷன், Zombie இப்படி புகுந்து வெளையாடலாம்... இருநூறு வயசு வாழற பெரியவர், ஆயிரம் வருசம் வாழும் மந்திரி, நிழலை வச்சே முத்தம் கொடுக்கிற ராஜான்னு மாயாஜாலம்...’

’மந்திர தந்திரப் படம் மாதிரியா?’

’நிறம், மொழி, பண்பாடு இப்படி எல்லாத்திலேயும் சரித்திர காலத்தை காமிக்கிறோம். மூங்கிலை வளைச்சு கத்தியால தன் தலையைத்தானே அறுத்து களபலி கொடுக்கிறது, சக்கரவியூகம் மாதிரி போர்த் தந்திரங்கள், வீர விளையாட்டுத் திடல்ல ஆளுங்களப் போட்டு கொல்றது, கல்வெட்டு தமிழ்ல உரையாடறது...’

’செல்வா! Are not we shooting at many directions? ரொம்பவும் உட்டாலக்கடியா இருக்கே.’

அப்படின்னு இந்த இடத்துல யாராவது கேட்டிருக்க வேண்டும். சேணம் போடாத குதிரைல கண்ணைக் கட்டிகிட்டு பயணம் போன மாதிரி ஆகி விட்டது ஆயிரத்தில் ஒருவன் திரைப்படம்.

Gladiator, Mummy Returns, Lord of the Rings, Apocalypto, Raiders of the last ark என்று ஏகப்பட்ட பாதிப்புகளோடு தமிழில் ஒரு வரலாற்றுப் புனைவை திரைப்படமாக எடுக்க முயற்சித்திருக்கிறார்கள். கார்த்தி திரையில் வரும்போதெல்லாம் மக்கள் ரசித்து சிரிக்கிறார்கள். இரண்டு பெண் நாயகிகளையும் சரிக்கு சமமாக உரசி லொள்ளு செய்கிறார். ரீமாசென் மற்றும் பார்த்திபனுக்கு நல்ல காத்திரமான பாத்திரம். ஆண்ட்ரியா வந்து போகிறார். ஜிவி பிரகாஷின் பின்னணி இசை இரைச்சலாக இருக்கிறது. பாடல்கள் பிரபலமாகி நல்ல வரவேற்பைப் பெற்று இருக்கிறது. காமிரா ராம்ஜி கலக்குகிறார். மிகப்பெரிய சறுக்கல் Computer Graphics. யார் செய்திருக்கிறார்கள் என்று தெரிந்தால் அவர்கள் பெயர் சொல்லி திருஷ்டி பூசனிக்காய்க்கு திருஷ்டி சுற்றிப் போடலாம்.

பல்வேறு திசைகளிலும் தளங்களிலும் பயணிக்கும் இந்தக் கதைக்கு இரண்டு வருடங்கள் உழைத்து முப்பது கோடிக்கு மேல் செலவழித்து திரைப்படமாக எடுத்திருக்கிறார்களாம். இயக்குநர் தன் சொந்தப் பணம் பல கோடிகள் செலவழித்து படத்தை வெளியிட்டிருக்கிறாராம். அய்யோ பாவம் செல்வா என்றிருக்கிறது.

பாலகுமாரனுக்கு டைட்டில் க்ரெடிட் கொடுக்கப்பட்டிருக்கிறதா என்று தெரியாது. திரைப்படத்தில் பிற்பகுதியில் வரும் சோழர்கால வரலாறு முழுவதும் பாலகுமாரனின் ‘உடையாரி’லிருந்துதான் (நான் படித்ததே கொஞ்சம்தான் அதில்) எடுக்கப் பட்டிருக்கிறது என்று தெரிகிறது. அதுவும் அந்த மூங்கிலை வளைத்து தலையை அறுத்துக் கொள்ளும் காட்சி அவர் நிறைய கதைகளில் எழுதியிருக்கிறார். அவருடைய ஸ்டைல் ராஜா அளவிற்கு மந்திரியையும் ஹீரோவாக்குவது (அநிருத்த பிரம்மராயர், அவர் மகன் அருள்மொழி பட்டன்). இந்தப் படத்திலும் ஒரு மதியூக மந்திரி சோழ வம்சத்தை ஒளித்து வைத்துப் பாதுகாக்கிறார். மாயாஜால அரண்கள் எல்லாம் அமைத்து சூட்சும ரூபமாக காவல் காக்கிறார். ஆயிரம் வருஷங்கள் உயிர் வாழ்ந்துவிட்டு இன்னொருவனுக்கு எல்லா சக்தியையும் தத்தம் செய்கிறார். அதுதான் ஆயிரத்தில் ஒருவன்.

முன்பாதியில் கலகலப்பாக தொடங்கி பல சாகசங்களைக் கடந்து செல்லும் தேடுதல் குழு என்று பயணிக்கிறது கதை. பின்பாதி முழுவதும் கிபி ஆயிரமாவது ஆண்டு சோழ தேச மக்களும் அவர்களின் வாழ்க்கையைப் பற்றியும் காண்பிக்கிறார்கள். நடுவில் மாயதந்திரம், களரிச் சண்டைகள், மனலுக்குள் நீச்சலடித்து வரும் போர் வீரர்கள், இராணுவத்தினரின் அட்டூழியம், என்றெல்லாம் போகிறது.

செல்வராகவன் புரிந்து கொள்ளாத ஒரு விஷயம் என்னவென்றால்... இம்மாதிரியான கதைகளை திரைப்படத்தில் நேரடியாக சொல்லிவிட முடியாது. சொல்லிவிடவே முடியாது. போதாததற்கு படத்தின் தொடக்கத்தில் ஒரு உரிமைதுறப்பான் (Disclaimer) போட்டு விடுகிறார்கள். இந்தப் படத்தில் வரும் சம்பவங்கள் அனைத்தும் வரலாற்று சான்றில்லாத புனைவே என்று. நல்லது. அதனால் இந்தக் கதையின்பாற் ஏற்படும் கேள்விகளுக்கு எங்கு போய் விடை தேடுவது?

மேற்குறிப்பிட்ட படங்கள் எல்லாவற்றுக்கும் பின்னால் ஒரு வலுவாக நெய்யப்பட்ட முழுமையான கதை கண்டிப்பாக இருக்கிறது. ’ஆயிரத்தில் ஒருவன்’ கதையின் பின்புலம் தெரியாமல் எத்தனை கேள்விகள் எழுகின்றன? தனது கடைசி வாரிசைக் காப்பாற்றுவதற்காகவும், சோழவம்சத்தை என்றென்றும் துலங்கச் செய்யவும், நினைக்கும் அந்த சோழ ராஜா எதற்காக பாண்டியரிடமிருந்து அபகரித்த அவர்களின் குல தெய்வச் சிலையையும் இளவலோடு சேர்த்து ஒளித்து வைக்க வேண்டும்? அப்பொழுதுதான் பாண்டியர்கள் உத்தரவாதமாக அந்த இளவரசனைத் தேடி வந்து சோழர்களை அழிப்பார்களாமா?

இது போல் ஏகப்பட்ட கேள்விகள் முடிவில்லாமல் வந்து கொண்டேயிருக்கின்றன. அதுவும் வெளியுறவுத் தொடர்புகளை சுத்தமாக துண்டித்துவிட்டு 'Self-reliant'ஆக இருக்கும் ஒரு கூட்டத்தைப் பற்றிய கதை என்பதால் இயற்கையாக எழும் கேள்விகள். படத்தில் பெரும்பாலும் விடைகள் இல்லை. ஒரே ஒரு பையில் குவாட்டர் ஓல்ட் மாங்கைப் போட்டுக் கொண்டு சோழர்கள் இருக்கும் தீவைத் தேடிப் போன பிரதாப் போத்தனை தேடி பெரிய கூட்டமே ஆராய்ச்சி உபகரணங்களோடு போகிறார்கள். அப்படியானால் முதலில் போன பிரதாப் ஆராய்ச்சி எதுவும் செய்யப் போகவில்லையா? வியட்நாமிற்கு சென்னையிலிருந்து கப்பலில்தான் போக வேண்டுமா? எம்ஜிஆர் பாட்டை ரீமிக்ஸ் செய்யும் வாய்ப்பை தவிர வேறு என்ன முகாந்திரம் அந்த கப்பல் பயணத்திற்கு?

ஒரு ஆராய்ச்சியில் ஈடுபடும் அலுவலர்கள் மற்றும் இராணுவத்தினரின் உயிருக்கு அரசாங்கம் பொறுப்பேற்காது தொல்பொருள் ஆராய்ச்சி திட்டத் தலைவி அறிவிக்க முடியுமா? ஜெராக்ஸ், மைக்ரோஃபிலிம், எல்லாம் இந்திய தொல்பொருள் ஆராய்ச்சியாளர்களுக்கு அளிக்கப்படாததா? பழைய கால அரிய ஓலைச்சுவடிகளை அப்படியே தூக்கிக்கொண்டு சுற்றுவதுதான் எந்தவகை ஆராய்ச்சி?

பஞ்சத்தினால் பாதிக்கப்பட்டு குழந்தைக்கு பால் கொடுக்க இளம் தாயின் மார்பில் பால் வரவில்லை இரத்தம்தான் வருகிறது என்று காட்டுகிறார்கள். அப்படி அவர்கள் என்னதான் தொழில் செய்கிறார்கள்? வேளாண்மை, வணிகம், மீன்பிடிப்பது என்று எதுவும் செய்கிறார்களா? இறைச்சியை பங்கு போட்டுக் கொள்கிறார்கள் என்றால் வேட்டையாடுகிறார்களா? சோழர்கள் சைவர்கள் என்பதைக் காட்ட எல்லாரும் திருநீறு இட்டுக் கொண்டு ஆடிப் பாடுகிறார்கள். சாணத்திலிருந்து தயாரிக்கும் திருநீறு என்பதால் அவர்கள் கால்நடை வளர்க்கிறார்களா? வீர சைவர்களான சோழர்கள் கல்வெட்டு வழக்கில் ‘லிங்க தரிசனம்’ என்றெல்லாம் வாமாச்சார வழக்குகள் பேசுவார்களா? சோழர்கள் எந்த காலத்தில் நரம்புப் புள்ளிகளில் ஊசி குத்தும் யுனானி மருத்துவத்தை கையாண்டார்கள்? ராஜேந்திர சோழனின் காலந்தொட்டே தென்கிழக்கு ஆசியாவில் பல இடங்களில் வெற்றி கொண்ட சோழர்கள், அரேபியா, யவனம், இலங்கை, சாவகம், கடாரம் என்று வணிகம் செய்த சோழர்கள் பத்தாம் நூற்றாண்டிலும் கலப்பேயில்லாத சுத்த கருப்பு வண்ணதிலேயே இருக்கிறார்களாமா? பிரவாஹன் போன்றோர் முன்வைக்கும் பழுப்பு நிற திராவிடர் கருத்தாக்கம் தவறு என்று சொல்கிறார்களா? பத்தாம் நூற்றாண்டு காலத்து கலாச்சாரத்தில் சாதி பாகுபாடுகள் கிடையாதா? எதற்கு பாண்டிய வாரிசு சோழ அரசனுடன் உதிரம் கலக்க வேண்டும் என்று கன்னாபின்னாவென்று முத்தம் கொடுக்கிறார்? வியட்நாம் பக்கத்திலிருக்கும் ஒரு ஆதிவாசிக் கூட்டம் கறுப்பாக இருக்கிறது. இன்னொரு ஆதிவாசிக் கூட்டம் சிவப்பு வண்ணத்தில் இருக்கிறார்களே?

பாண்டியர்களின் கொடியில் மீன் இருப்பது என்பதற்காக அவர்களின் குலதெய்வத்தையும் மீனாக காட்டுவது ஏனோ? சோழனுக்கும் ஏதாவது புலித்தேவரை சாமியாக காட்டாமல் சிவனையே தெய்வமாக காட்டுவது என்னவகை கதை யோசனை?

கொலைசெய்யப் கத்தியோடு பாய்ந்து வரும ஆதிவாசிக் கூட்டத்தைப் பார்த்துவிட்டும் ‘hold fire' என்று சொல்லிக் கொண்டே இருக்கும் இராணுவ கமாண்டருக்கு எங்கே ட்ரெய்னிங் கொடுக்கிறார்கள்? இந்திய இராணுவத்தினரிடம் SLRம், கையெறி குண்டையும் தவிர வேறு ஆயுதமே இல்லையாமா? ஒரு பயனைட் கூட இல்லாமல் பாவம் எதிரிகளின் கத்திகளுக்கு இரையாகுகிறார்கள் பாவம். ரீமா சென்னின் கைத்துப்பாக்கியில் அதிகபட்சம் எத்தனை குண்டுகள் போடலாம்? எந்த இராணுவம் எதிரிகளைச் சுற்றி வட்டமாக நின்றுகொண்டு துப்பாக்கியால் சுடச் சொல்லித்தருகிறது? ஆவ்வ்வ்வ்.... போதும்.

இந்தக் கதையை முழுமையாக ஒரு நாவலாக செய்துகொண்டு அதை வெளியிட்டு, நல்ல முறையில் சந்தைப் படுத்தி மக்களுக்கு இந்தக் கதையின் மாந்த்ரீக, தாந்த்ரீக, கலாச்சார பின்புலனை அறிமுகம் செய்துவிட்டு திரைப்படமாக எடுத்திருக்க வேண்டும்.

இன்னமும் சில நாட்களுக்கு சுஹாசினியுடன் பேசிக்கொண்டோ, அனுவோடு காப்பிக் குடித்துக் கொண்டோ செல்வராகவன் பேட்டி கொடுப்பாரா இருக்கும். ‘இந்த genreல் தமிழிலேயே இதாங்க முதல் படம்...’. நல்லது. அடுத்த முயற்சியிலாவது கதையை முழுமையாக தயார் செய்து கொள்ளுங்கள் செல்வா.