இந்தியக் குடியரசு தின வாழ்த்துகள்

இன்று இந்தியா தனது 61வது குடியரசு தினத்தை கொண்டாடுகிறது. இன்னொரு விதத்தில் இது இந்தியாவின் 81வது சுதந்திர தினம் என்றும் சொல்லலாம். 1930ம் வருடம் ஜனவரி 26 அன்றுதான் இந்திய தேசிய காங்கிரஸ் ‘பூரண சுதந்திரம்’ என்று பிரகடனம் செய்து அப்போதைய காங்கிரஸ் தலைவர் ஜவகர்லால் நேரு லாகூரில் இந்திய மூவர்ணக் கொடியேற்றினார். இன்று முதல் ஜனவரி 26ஐ சுதந்திர தினமாக கொண்டாடுங்கள் என்று காங்கிரஸ் இயக்கம் இந்திய நாட்டு மக்களையும் கேட்டுக் கொண்டது.

அந்நாளில் காங்கிரஸ் பேரியக்கமாக பரிணமித்து இருந்தாலும் முழு சுதந்திரம் இந்தியாவிற்கு தோதுபடாது என்ற கருத்துகளோடு சில பலமான இயக்கங்களும் இருந்தன. அன்றைய பிரிட்டிஷ் அரசாங்கமும் இந்தியாவிற்கு பூரண சுதந்திரம் அளிப்பதில் உண்டாகும் சிக்கல்களைக் குறித்த எச்சரிக்கையில் இருந்தது. இந்த கருத்து வேற்றுமைகளுக்கு நடுவில் இந்திய தேசிய காங்கிரஸ் இயக்கம் மட்டுமே ‘பூரண சுதந்திரமே எமது இலக்கு’ என்று உறுதியாக நின்றது. காங்கிரஸின் தொடர்ந்த அழுத்தத்தில் பிரிட்டிஷ் அரசாங்கம் மிக விஸ்தாரமாக ‘இந்திய அரசாங்க சட்டம் - 1935’ என்ற சட்டம் மூலமாக இந்திய அரசியலமைப்பிற்கு முழு வடிவம் கொடுக்க முனைந்தது. இதனை இன்றைய அரசிலமைப்ப் சட்டத்திற்கு முன்னோடி எனக் கூறலாம். அதில் காங்கிரஸ் எதிர்பார்த்த Bill of Rights (உரிமைப் பிரகடனம்) இடம் பெறவில்லை. இந்தச் சட்டத்தை முழுவதுமாக நிறைவேற்ற முடியாமல் பிரிட்டிஷ் அரசாங்கம் திணறியதில் இந்திய சுதந்திர போராட்டம் வலிமையடைந்தது.

தொடர்ந்து இந்தியர்களிடம் இந்தியாவை ஆளும் அதிகாரத்தை கையளிக்க முடிவு செய்து 1947ல் இந்திய சுதந்திரச் சட்டம் பிறப்பிக்கப் பட்டது. பிரிட்டிஷ் ஆட்சியிலிருந்து விடுதலையளிக்கப் பட்டாலும் இந்தியா ஒரு dominion அந்தஸ்துள்ள காமென்வெல்த் நாடாகத்தான் அங்கீகரிக்கப் பட்டது. மிச்ச சொச்ச பிரிட்டிஷ் முடியாட்சி பாரம்பர்யத்தை துண்டித்துக் கொண்டு 1950ல் இந்தியா தன்னை ஜனநாயக குடியரசாக பிரகடனப்படுத்திக் கொண்டது. பி ஆர் அம்பேத்கர் தலைமையிலான ஆறு சட்டறிஞர்கள் கொண்ட அரசியலமைப்பு வரைவுக் குழு தயாரித்த அரசியலமைப்பு சட்டத்தை கிட்டத்தட்ட இரண்டு வருடங்கள் விவாதித்து செதுக்கி 1950ல் அமல்படுத்தியிருக்கிறோம்.

ஆங்கிலேயர்களின் இராணுவ மற்றும் பொருளாதார வலிமை குன்றிருந்த காலகட்டம் அது. இயற்கையாகவே காலனி ஆதிக்கங்கள் முடிவுக்கு வந்தவண்ணம் இருந்தன. இந்திய சுதந்திரம், தொடர்ந்து குடியரசாக மாறியது போன்றவைகள் அந்த நீரோட்டத்தில் அமைந்த இயல்பான நிகழ்ச்சிகள் என்றாலும், சுதந்திரம் கையளிக்கப்படுமுன்னரே பிரிவினைக்கு ஆளான ஒரு பிரதேசம் இத்தனை வருடங்களாக தொடர்ந்து ஒரு ஐக்கிய குடியரசாக ஜனநாயக முறையில் செயல்பட்டு வருவது குறிப்பிடத்தக்கது. அதுவும் கடந்த பத்தாண்டுகளுக்கும் மேலாக வளர்ச்சிப் பாதையில் விரைந்து சென்று கொண்டிருக்கிறோம். பிறிதொரு காலத்தில் இந்தியாவின் பொற்காலத்தின் தொடக்கமாக நாம் இருக்கும் இந்த காலகட்டத்தை வரலாற்று் அறிஞர்கள் கண்டறியலாம்.

அண்டை நாட்டுடன் சுமுக உறவுகள், எல்லைப் பிரச்சினைகள், ஏழைகளின் வாழ்வாதார பிரச்சினைகள், விலைவாசி உயர்வு, குழப்பமான ஜனநாயக அரசியல், பண்பாட்டு பிரச்சினைகள், மதக்கலவரங்கள், பாதுகாப்பு பயமுறுத்தல்கள் என்று ஏகத்துக்கு இருக்கும் சிக்கல்களிடையே இந்தியா வெற்றிகரமாக ஒன்றிணைந்த குடியரசாக இருப்பது ஒரு சாதனையே. இந்திய குடிமக்கள் எல்லோருக்கும் குடியரசு தின வாழ்த்துகள்.